jalwa-gar us ka sarapa hai badan aaine mein

jalva-gar us kā sarāpā hai badan aa.ine meñ

nazar aatā hai hameñ sarv-e-chaman aa.ine meñ

sīna-sāfoñ se ḳhabar ālam-e-alvī kī to pūchh

arsh o kursī hai yahāñ aks-fagan aa.ine meñ

tāb-e-āzurdagī kab hai dil-e-āshiq ko yahāñ

chīn-e-peshānī se paḌtī hai shikan aa.ine meñ

chashm-e-bīmār se Tapke thā lahū dekhte vaqt

palkeñ hiliyāñ to paḌā zor hī ran aa.ine meñ

le liyā pyaar se aks apne kā jhuk kar bosa

us ne dekhā jo vo pāñ-ḳhurda dahan aa.ine meñ

abraq-e-soḳhta sā kyuuñ na nazar aa.e jo ho

ātish-e-husn tirī sā.iqa-zan aa.ine meñ

daam meñ lāveñ vo tā aks kī tere tasvīr

zulfeñ pheñkīñ haiñ do jānib se rasan aa.ine meñ

āb-e-jū kā hai ye aalam ki nazar aatā hai

la.al-e-rummānī sā har gul kā baran aa.ine meñ

dil-e-māyūs ko pahne hue aatī haiñ nazar

saikaḌoñ hasrat-e-dīdār kafan aa.ine meñ

aa.ina dekhte pīchhe se jo maiñ aa niklā

aks par aks huā sāya-fagan aa.ine meñ

thī to āzurdagī muddat se pa vo rūThe hue

bin manā.e ga.e be-sāḳhta man aa.ine meñ

'mus.hafī' kyuuñ na kahe tujh ko koī tūtī-e-hind

jab tū is vaz.a kare fikr-e-suḳhan aa.ine meñ

jalwa-gar us ka sarapa hai badan aaine mein

nazar aata hai hamein sarw-e-chaman aaine mein

sina-safon se KHabar aalam-e-alwi ki to puchh

arsh o kursi hai yahan aks-fagan aaine mein

tab-e-azurdagi kab hai dil-e-ashiq ko yahan

chin-e-peshani se paDti hai shikan aaine mein

chashm-e-bimar se Tapke tha lahu dekhte waqt

palken hiliyan to paDa zor hi ran aaine mein

le liya pyar se aks apne ka jhuk kar bosa

us ne dekha jo wo pan-KHurda dahan aaine mein

abraq-e-soKHta sa kyun na nazar aae jo ho

aatish-e-husn teri saiqa-zan aaine mein

dam mein lawen wo ta aks ki tere taswir

zulfen phenkin hain do jaanib se rasan aaine mein

aab-e-ju ka hai ye aalam ki nazar aata hai

lal-e-rummani sa har gul ka baran aaine mein

dil-e-mayus ko pahne hue aati hain nazar

saikaDon hasrat-e-didar kafan aaine mein

aaina dekhte pichhe se jo main aa nikla

aks par aks hua saya-fagan aaine mein

thi to aazurdagi muddat se pa wo ruThe hue

bin manae gae be-saKHta man aaine mein

'mushafi' kyun na kahe tujh ko koi tuti-e-hind

jab tu is waza kare fikr-e-suKHan aaine mein