jalwa-ha-e-zindagi ko kya kahen

jalva-hā-e-zindagī ko kyā kaheñ

chaar din kī chāñdnī ko kyā kaheñ

dekhte haiñ chehra-e-ḳhāshāk bhī

phuul terī tāzgī ko kyā kaheñ

tifl-e-maktab kī nazar bhī kyā nazar

aql terī rahbarī ko kyā kaheñ

āñdhiyoñ se dekhiye us kā ġhurūr

ḳhāk-e-pā kī ājizī ko kyā kaheñ

dil ġham-o-andoh se ḳhālī to ho

lāla-o-gul kī hañsī ko kyā kaheñ

kuchh nahīñ sab khel hai taqdīr kā

vaqt terī be-ruḳhī ko kyā kaheñ

sab se kah detā hai 'ahmad' hāl-e-dil

us ke dil kī sādgī ko kyā kaheñ

jalwa-ha-e-zindagi ko kya kahen

chaar din ki chandni ko kya kahen

dekhte hain chehra-e-KHashak bhi

phul teri tazgi ko kya kahen

tifl-e-maktab ki nazar bhi kya nazar

aql teri rahbari ko kya kahen

aandhiyon se dekhiye us ka ghurur

KHak-e-pa ki aajizi ko kya kahen

dil gham-o-andoh se KHali to ho

lala-o-gul ki hansi ko kya kahen

kuchh nahin sab khel hai taqdir ka

waqt teri be-ruKHi ko kya kahen

sab se kah deta hai 'ahmad' haal-e-dil

us ke dil ki sadgi ko kya kahen