jalwe hain tere husn ke sham-o-sahar alag alag

jalve haiñ tere husn ke shām-o-sahar alag alag

bahr-e-nazāra chāhiye zauq-e-nazar alag alag

husn-e-azal hai munfarid jalve haiñ us ke be-shumār

bāda-e-nāb ek hai ḳhum haiñ magar alag alag

ahl-e-havas ko hai surūr sāhib-e-dil ko be-ḳhudī

nargis-e-nāz ne kiyā apnā asar alag alag

ye bhī hai koī zindagī aisī bhī kyā kashīdgī

ham haiñ idhar judā judā vo haiñ udhar alag alag

ġhair pe raaz khul gayā husn ko taish aa gayā

nāla-e-shauq ne kiyā apnā asar lag alag

mast-e-nashāt-o-sarḳhushī shab ko baham the husn-o-ishq

shor-e-azāñ ne kar diyā vaqt-e-sahar alag alag

sharm kā un ko hai lihāz vaz.a kā ham ko hai ḳhayāl

ham bhī haiñ un se duur duur vo haiñ agar alag alag

un ko ye Dar thā bazm meñ ahl-e-nazar ko shak na ho

aa.e to mere saath saath baiThe magar alag alag

maiñ bhī huuñ muztarib 'valī' yaar ko bhī hai bekalī

donoñ kā haal hai burā vaqt-e-safar alag alag

jalwe hain tere husn ke sham-o-sahar alag alag

bahr-e-nazara chahiye zauq-e-nazar alag alag

husn-e-azal hai munfarid jalwe hain us ke be-shumar

baada-e-nab ek hai KHum hain magar alag alag

ahl-e-hawas ko hai surur sahib-e-dil ko be-KHudi

nargis-e-naz ne kiya apna asar alag alag

ye bhi hai koi zindagi aisi bhi kya kashidgi

hum hain idhar juda juda wo hain udhar alag alag

ghair pe raaz khul gaya husn ko taish aa gaya

nala-e-shauq ne kiya apna asar lag alag

mast-e-nashat-o-sarKHushi shab ko baham the husn-o-ishq

shor-e-azan ne kar diya waqt-e-sahar alag alag

sharm ka un ko hai lihaz waza ka hum ko hai KHayal

hum bhi hain un se dur dur wo hain agar alag alag

un ko ye Dar tha bazm mein ahl-e-nazar ko shak na ho

aae to mere sath sath baiThe magar alag alag

main bhi hun muztarib 'wali' yar ko bhi hai bekali

donon ka haal hai bura waqt-e-safar alag alag