jalwon se mere hosh uDane mein lage hain

jalvoñ se mire hosh uḌāne meñ lage haiñ

vo phir mujhe dīvāna banāne meñ lage haiñ

mar-mar ke kiye jaate haiñ ham yaad unheñ yaañ

aur vo hameñ vaañ dil se bhulāne meñ lage haiñ

vo aa.e kare kaun pazīrā.ī ab un kī

armāñ to yahāñ dhuum machāne meñ lage haiñ

phir dasht-e-talab aaj hai bebākī pe maa.il

vo dāman-e-nāz apnā chhuḌāne meñ lage haiñ

maiñ huuñ ki miTā jaatā huuñ har baat pe un kī

aur vo haiñ ki dil merā dukhāne meñ lage haiñ

'sāhir' jinheñ maiñ ne diyā mahbūbī kā rutba

vo nām-o-nishāñ merā miTāne meñ lage haiñ

jalwon se mere hosh uDane mein lage hain

wo phir mujhe diwana banane mein lage hain

mar-mar ke kiye jate hain hum yaad unhen yan

aur wo hamein wan dil se bhulane mein lage hain

wo aae kare kaun pazirai ab un ki

arman to yahan dhum machane mein lage hain

phir dasht-e-talab aaj hai bebaki pe mail

wo daman-e-naz apna chhuDane mein lage hain

main hun ki miTa jata hun har baat pe un ki

aur wo hain ki dil mera dukhane mein lage hain

'sahir' jinhen main ne diya mahbubi ka rutba

wo nam-o-nishan mera miTane mein lage hain