jamal-e-shahid-e-fitrat ka parda-dar hun main

jamāl-e-shāhid-e-fitrat kā parda-dār huuñ maiñ

guloñ kī kyā ho tamanna ki ḳhud bahār huuñ maiñ

alam kī tah meñ bhī rang-e-nashāt shāmil hai

mizāj-e-hastī-e-fānī kā rāzdār huuñ maiñ

ajab tilism kā aalam hai bazm-e-sāqī meñ

na be-ḳhabar huuñ maiñ ḳhud se na hoshiyār huuñ maiñ

jabīn-e-shauq kabhī vaqf-e-āstāñ na huī

vaqār-e-ishq-o-mohabbat kā pāsdār huuñ maiñ

jiyūñ to nang-e-mohabbat marūñ to nang-e-vafā

asīr-e-kashmakash-e-jabr-o-iḳhtiyār huuñ maiñ

ḳhudā kare koī terā payām le aa.e

tire baġhair ka.ī din se be-qarār huuñ maiñ

'bahār' mujh se mohabbat kā haq adā na huā

samajh rahā thā zamāna vafā-shi.ār huuñ maiñ

jamal-e-shahid-e-fitrat ka parda-dar hun main

gulon ki kya ho tamanna ki KHud bahaar hun main

alam ki tah mein bhi rang-e-nashat shamil hai

mizaj-e-hasti-e-fani ka raazdar hun main

ajab tilism ka aalam hai bazm-e-saqi mein

na be-KHabar hun main KHud se na hoshiyar hun main

jabin-e-shauq kabhi waqf-e-astan na hui

waqar-e-ishq-o-mohabbat ka pasdar hun main

jiyun to nang-e-mohabbat marun to nang-e-wafa

asir-e-kashmakash-e-jabr-o-iKHtiyar hun main

KHuda kare koi tera payam le aae

tere baghair kai din se be-qarar hun main

'bahaar' mujh se mohabbat ka haq ada na hua

samajh raha tha zamana wafa-shiar hun main