janam liya hai jo insan-farosh nagri mein

janam liyā hai jo insāñ-farosh nagrī meñ

sukūt chhāyā huā hai ḳhamosh-nagrī meñ

jo muñh kī khā ke palaTtā hai aur bastī se

nikāltā hai vo sab apnā josh nagrī meñ

agarche chehre se ye saḳht-gīr lagte haiñ

sabhī haiñ dost-sifat barf-posh nagrī meñ

tumhāre shahr ke shar shor kā asar hī nahīñ

ki chhoḌ aayā huuñ maiñ chashm-o-gosh nagrī meñ

paḌī hai sab ko yahāñ apnā sar chhupāne kī

koī to mujh sā dikhe sarfarosh nagrī meñ

amīr-e-shahr ne sarf-e-nazar pisar se kiyā

ġharīb-e-shahr kā niklā hai dosh nagrī meñ

ugā rahe haiñ yahāñ fasl zulmatoñ kī jo

sunā.ī dī hai navā-e-sarosh nagrī meñ

bahār aa.ī hai piilī ḳhizāñ rutoñ ke baa'd

so paayā jaatā hai josh-o-ḳharosh nagrī meñ

'rashīd' naam ke sunte haiñ koī shā.er haiñ

nahīñ hai un sā koī shabdkosh nagrī meñ

janam liya hai jo insan-farosh nagri mein

sukut chhaya hua hai KHamosh-nagri mein

jo munh ki kha ke palaTta hai aur basti se

nikalta hai wo sab apna josh nagri mein

agarche chehre se ye saKHt-gir lagte hain

sabhi hain dost-sifat barf-posh nagri mein

tumhaare shahr ke shar shor ka asar hi nahin

ki chhoD aaya hun main chashm-o-gosh nagri mein

paDi hai sab ko yahan apna sar chhupane ki

koi to mujh sa dikhe sarfarosh nagri mein

amir-e-shahr ne sarf-e-nazar pisar se kiya

gharib-e-shahr ka nikla hai dosh nagri mein

uga rahe hain yahan fasl zulmaton ki jo

sunai di hai nawa-e-sarosh nagri mein

bahaar aai hai pili KHizan ruton ke ba'd

so paya jata hai josh-o-KHarosh nagri mein

'rashid' nam ke sunte hain koi shaer hain

nahin hai un sa koi shabdkosh nagri mein