jang par aur na adawat pe yaqin rakhta hun

jang par aur na adāvat pe yaqīñ rakhtā huuñ

maiñ huuñ insān mohabbat pe yaqīñ rakhtā huuñ

kab maiñ sarmāya-o-daulat pe yaqīñ rakhtā huuñ

zindagī ke liye mehnat pe yaqīñ rakhtā huuñ

āsmāñ bhī tire qadmoñ pe jhukegā ik din

ai vatan maiñ tirī azmat pe yaqīñ rakhtā huuñ

dharm ke naam kā nīlām mubārak tum ko

kab maiñ maz.hab kī tijārat pe yaqīñ rakhtā huuñ

zinda tārīḳh kā unvāñ hai shahīdoñ kā lahū

azmat-e-zauq-e-shahādat pe yaqīñ rakhtā huuñ

haram-o-dair-o-kalīsā kī taraf kyoñ jā.ūñ

maiñ to insāñ kī mohabbat pe yaqīñ rakhtā huuñ

jang par aur na adawat pe yaqin rakhta hun

main hun insan mohabbat pe yaqin rakhta hun

kab main sarmaya-o-daulat pe yaqin rakhta hun

zindagi ke liye mehnat pe yaqin rakhta hun

aasman bhi tere qadmon pe jhukega ek din

ai watan main teri azmat pe yaqin rakhta hun

dharm ke nam ka nilam mubarak tum ko

kab main mazhab ki tijarat pe yaqin rakhta hun

zinda tariKH ka unwan hai shahidon ka lahu

azmat-e-zauq-e-shahadat pe yaqin rakhta hun

haram-o-dair-o-kalisa ki taraf kyon jaun

main to insan ki mohabbat pe yaqin rakhta hun