jangal jangal DhunDne wali mujhko sadaen kis ki thin

jangal jangal DhūñDne vaalī mujh ko sadā.eñ kis kī thiiñ

manzar jo ta.amīr huā thā us pe ghaTā.eñ kis kī thiiñ

barg-o-shajar sab kaañp rahe the dīvāreñ chup-chāp khaḌī thiiñ

vo to san se guzar gayā thā phir ye havā.eñ kis kī thiiñ

apnī apnī qabā sañbhāle saare musāfir guzar ga.e

raah meñ lekin TukḌā-TukḌā kaalī ridā.eñ kis kī thiiñ

kabhī kabhī to sab kuchh ġhā.eb kaisā maiñ aur kaisā vo

tere is āfāq nagar meñ aisī adā.eñ kis kī thiiñ

mere saa.e ke aage koī saaya laraz rahā thā

nikle the jab ghar se apne saath duā.eñ kis kī thiiñ

vo jo bahut ḳhūñ-rez thā sāvan vo to ham ne jī bhī liyā

shāḳh-e-shafaq par pattā-pattā zard qabā.eñ kis kī thiiñ

aañkh meñ merī patthar gum thā pyaas meñ merī sahrā gum

vo to mujh ko chhoḌ chukā thā phir ye jafā.eñ kis kī thiiñ

arzāñ kis kā nuur nihāñ thā nannhī-nannhī kaliyoñ meñ

pattā-pattā ai gul-e-ḳhūbī tujh pe qabā.eñ kis kī thiiñ

jangal jangal DhunDne wali mujh ko sadaen kis ki thin

manzar jo tamir hua tha us pe ghaTaen kis ki thin

barg-o-shajar sab kanp rahe the diwaren chup-chap khaDi thin

wo to san se guzar gaya tha phir ye hawaen kis ki thin

apni apni qaba sanbhaale sare musafir guzar gae

rah mein lekin TukDa-TukDa kali ridaen kis ki thin

kabhi kabhi to sab kuchh ghaeb kaisa main aur kaisa wo

tere is aafaq nagar mein aisi adaen kis ki thin

mere sae ke aage koi saya laraz raha tha

nikle the jab ghar se apne sath duaen kis ki thin

wo jo bahut KHun-rez tha sawan wo to hum ne ji bhi liya

shaKH-e-shafaq par patta-patta zard qabaen kis ki thin

aankh mein meri patthar gum tha pyas mein meri sahra gum

wo to mujh ko chhoD chuka tha phir ye jafaen kis ki thin

arzan kis ka nur nihan tha nannhi-nannhi kaliyon mein

patta-patta ai gul-e-KHubi tujh pe qabaen kis ki thin