jangal jangal sahra sahra sirf gham-e-uftad hue

jangal jangal sahrā sahrā sirf ġham-e-uftād hue

ahl-e-junūñ par ishq kī rahmat vīrāne ābād hue

kal tak jo ma.asūm-sifat the aaj vahī jallād hue

rafta rafta shaiḳh-o-barahman kitne sitam-ījād hue

mausam-e-gul ke aate aate gulchīnoñ kī sāzish se

kitne girebāñ chaak hue haiñ kitne ghar barbād hue

dām-e-havas har ek nafas hai barq-e-hasad har ek nazar

nazm-e-gulistāñ kyūñ-kar badle said bhī ab sayyād hue

sadiyoñ ke is ujḌe chaman kī ḳhuun se gul-kārī hogī

sunte haiñ arbāb-e-mohabbat zindāñ se āzād hue

pūchhe koī arbab-e-jafā se ab ye pashemānī kab tak

muddat guzrī ahl-e-vafā par taaza sitam ījād hue

be-adabī meñ jo yaktā haiñ Thahre imām-e-bazm-e-adab

jin ko sher na kahnā aaya fan ke vahī ustād hue

dāġh-e-judā.ī ke sadmoñ se kyā guzrī hai kis se kahūñ

kaise kaise phuul chaman ke nazr-e-ġham-e-bedād hue

terī ḳhushī se ham ko ġharaz hai terī razā se kaam hameñ

shaad hue ham terī ḳhātir tere liye nāshād hue

qāmat-e-mauzūñ ke afsāne sehn-e-chaman tak jā pahuñche

ḳhush-andām-e-fasl-e-bahārāñ sard hue shamshād hue

ahd-e-taġhāful kā afsāna un se 'jamāl' ab kyā kahiye

lutf-o-karam sab bhuul ga.e ham jaur-o-sitam sab yaad hue

jangal jangal sahra sahra sirf gham-e-uftad hue

ahl-e-junun par ishq ki rahmat virane aabaad hue

kal tak jo masum-sifat the aaj wahi jallad hue

rafta rafta shaiKH-o-barahman kitne sitam-ijad hue

mausam-e-gul ke aate aate gulchinon ki sazish se

kitne gireban chaak hue hain kitne ghar barbaad hue

dam-e-hawas har ek nafas hai barq-e-hasad har ek nazar

nazm-e-gulistan kyun-kar badle said bhi ab sayyaad hue

sadiyon ke is ujDe chaman ki KHun se gul-kari hogi

sunte hain arbab-e-mohabbat zindan se aazad hue

puchhe koi arbab-e-jafa se ab ye pashemani kab tak

muddat guzri ahl-e-wafa par taza sitam ijad hue

be-adabi mein jo yakta hain Thahre imam-e-bazm-e-adab

jin ko sher na kahna aaya fan ke wahi ustad hue

dagh-e-judai ke sadmon se kya guzri hai kis se kahun

kaise kaise phul chaman ke nazr-e-gham-e-bedad hue

teri KHushi se hum ko gharaz hai teri raza se kaam hamein

shad hue hum teri KHatir tere liye nashad hue

qamat-e-mauzun ke afsane sehn-e-chaman tak ja pahunche

KHush-andam-e-fasl-e-bahaaran sard hue shamshad hue

ahd-e-taghaful ka afsana un se 'jamal' ab kya kahiye

lutf-o-karam sab bhul gae hum jaur-o-sitam sab yaad hue