jangal ki tarah phaila hua Dar sameT kar

jañgal kī tarah phailā huā Dar sameT kar

maiñ jaanā chāhtā huuñ kahīñ ghar sameT kar

duniyā sameTne ke talabgār haiñ bahut

rakkhā hai maiñ ne ḳhud ko bhī aksar sameT kar

jī chāhtā hai rakh duuñ kisī roz aag par

ġham-hā-e-rozgār kā daftar sameT kar

kaaTī hai raat ham ne añdheroñ ke darmiyāñ

āñkhoñ meñ apnī sub.h kā manzar sameT kar

jīte-jī koī Daal gayā mere sar pe ḳhaak

apnā.iyat kī reshmī chādar sameT kar

'ma.asūm' āsmānoñ kī rakhte the jo ḳhabar

vo rauzanoñ meñ baiTh ga.e par sameT kar

jangal ki tarah phaila hua Dar sameT kar

main jaana chahta hun kahin ghar sameT kar

duniya sameTne ke talabgar hain bahut

rakkha hai main ne KHud ko bhi aksar sameT kar

ji chahta hai rakh dun kisi roz aag par

gham-ha-e-rozgar ka daftar sameT kar

kaTi hai raat hum ne andheron ke darmiyan

aankhon mein apni subh ka manzar sameT kar

jite-ji koi Dal gaya mere sar pe KHak

apnaiyat ki reshmi chadar sameT kar

'masum' aasmanon ki rakhte the jo KHabar

wo rauzanon mein baiTh gae par sameT kar