jangal tanaze’at ke sab pak ho gae

jangal tanāze’āt ke sab paak ho ga.e

jitne babūl the mirī imlāk ho ga.e

parde numūd-e-sub.h ke jab chaak ho ga.e

chehre ġhurūr-e-shām ke ġhamnāk ho ga.e

kahte haiñ rat-jagoñ ke maze ḳhaak ho ga.e

kis darja shab ke panchhī bhī chālāk ho ga.e

qadmoñ meñ jin ke dafn thiiñ gurdoñ kī rif'ateñ

kyā vo bagūle dasht kī ḳhūrāk ho ga.e

jis tarh chāhtā hai hameñ tū barat ke dekh

ham to ḳhushī se ḳhud tirī poshāk ho ga.e

apnā.iyat ke naam pe kitne hī sāda-dil

apne hī 'ahd ke ḳhas-o-ḳhāshāk ho ga.e

jin ko havā-e-zulm ne mismār kar diyā

vo ghar nishān-e-manzil-e-aflāk ho ga.e

sadiyāñ mirī hayāt pe jab ḳhanda-zan huiiñ

lamhe mire vujūd kā idrāk ho ga.e

'vasfī' shanāḳht 'ishq kī dushvār ho ga.ī

jazbe tamām pyaar ke saffāk ho ga.e

jangal tanaze’at ke sab pak ho gae

jitne babul the meri imlak ho gae

parde numud-e-subh ke jab chaak ho gae

chehre ghurur-e-sham ke ghamnak ho gae

kahte hain rat-jagon ke maze KHak ho gae

kis darja shab ke panchhi bhi chaalak ho gae

qadmon mein jin ke dafn thin gurdon ki rif'aten

kya wo bagule dasht ki KHurak ho gae

jis tarh chahta hai hamein tu barat ke dekh

hum to KHushi se KHud teri poshak ho gae

apnaiyat ke nam pe kitne hi sada-dil

apne hi 'ahd ke KHas-o-KHashak ho gae

jin ko hawa-e-zulm ne mismar kar diya

wo ghar nishan-e-manzil-e-aflak ho gae

sadiyan meri hayat pe jab KHanda-zan huin

lamhe mere wujud ka idrak ho gae

'wasfi' shanaKHt 'ishq ki dushwar ho gai

jazbe tamam pyar ke saffak ho gae