jangal uga tha hadd-e-nazar tak sadaon ka

jañgal ugā thā hadd-e-nazar tak sadāoñ kā

dekhā jo muḌ ke naqsha hī badlā thā gaañv kā

jismoñ kī qaid toḌ ke nikle to shahr meñ

hone lagā hai ham pe gumāñ devtāoñ kā

achchhā huā tahī haiñ zar-e-bandagī se ham

har moḌ par hujūm khaḌā hai ḳhudāoñ kā

sahrā kā ḳhaar ḳhaar hai mahrūm-e-tishnagī

kitnā sitam zarīf vo chhālā thā paañv kā

sar rakh ke ham bhī raat ke patthar pe so ga.e

ham ko bhī raas aayā na tesha vafāoñ kā

begānagī se mujh ko na yuuñ dekhiye ki maiñ

hissa huuñ aap hī ke darīche kī chhāñv kā

detā hai kaun dil ke kivāḌoñ pe dastakeñ

ye kaun ruup dhaar ke aayā havāoñ kā

'fāriġh' ġhubār-e-rāh ko tahqīr se na dekh

paiġhambar-e-bahār hai mausam ḳhizāoñ kā

jangal uga tha hadd-e-nazar tak sadaon ka

dekha jo muD ke naqsha hi badla tha ganw ka

jismon ki qaid toD ke nikle to shahr mein

hone laga hai hum pe guman dewtaon ka

achchha hua tahi hain zar-e-bandagi se hum

har moD par hujum khaDa hai KHudaon ka

sahra ka KHar KHar hai mahrum-e-tishnagi

kitna sitam zarif wo chhaala tha panw ka

sar rakh ke hum bhi raat ke patthar pe so gae

hum ko bhi ras aaya na tesha wafaon ka

beganagi se mujh ko na yun dekhiye ki main

hissa hun aap hi ke dariche ki chhanw ka

deta hai kaun dil ke kiwaDon pe dastaken

ye kaun rup dhaar ke aaya hawaon ka

'farigh' ghubar-e-rah ko tahqir se na dekh

paighambar-e-bahaar hai mausam KHizaon ka