jangalon ka na hi baghat ka pala hua hai

jangaloñ kā na hī bāġhāt kā paalā huā hai

ye kabūtar to mire haath kā paalā huā hai

amn kā ye jo parinda hai amaañ meñ merī

ye mirī niyyat-e-isbāt kā paalā huā hai

jis ko bhī dekhiye vo qaht kā lagtā hai shikār

jabki ye qaht bhī barsāt kā paalā huā hai

soz to is meñ nahīñ hai magar ik huuk sī hai

dil kā ye zaḳhm to ḳhadshāt kā paalā huā hai

maiñ ġhalat ho nahīñ saktā huuñ kisī bhī sūrat

ye tasavvur hī ḳhurāfāt kā paalā huā hai

har samajhdār use shaiḳh samajhne lag jaa.e

har ġhulām aisā jo sādāt kā paalā huā hai

jaane kaise ye samajh letā hai dil kī halchal

kyā mirā zehn ishārāt kā paalā huā hai

aaj usī zahr ko piinā hai tumheñ bhī 'aḳhtar'

haañ vahī zahr jo suqrāt kā paalā huā hai

jangalon ka na hi baghat ka pala hua hai

ye kabutar to mere hath ka pala hua hai

amn ka ye jo parinda hai aman mein meri

ye meri niyyat-e-isbaat ka pala hua hai

jis ko bhi dekhiye wo qaht ka lagta hai shikar

jabki ye qaht bhi barsat ka pala hua hai

soz to is mein nahin hai magar ek huk si hai

dil ka ye zaKHm to KHadshat ka pala hua hai

main ghalat ho nahin sakta hun kisi bhi surat

ye tasawwur hi KHurafat ka pala hua hai

har samajhdar use shaiKH samajhne lag jae

har ghulam aisa jo sadat ka pala hua hai

jaane kaise ye samajh leta hai dil ki halchal

kya mera zehn ishaaraat ka pala hua hai

aaj usi zahr ko pina hai tumhein bhi 'aKHtar'

han wahi zahr jo suqraat ka pala hua hai