jannat-e-abaad ko viran karte jaenge

jannat-e-ābād ko vīrān karte jā.eñge

gulsitāñ ko pāsbāñ shamshān karte jā.eñge

ḳhāna-e-jannat meñ ādam-zād kā maskan na ho

is ġharaz se ḳhud ko vo shaitān karte jā.eñge

tum lagā kar aag gulshan ko bhale kar do tabāh

ham to ātish-dān ko gul-dān karte jā.eñge

maut bhī parchhā.ī ban kar sāmne jab aa.egī

rafta-rafta us ko apnī jaan karte jā.eñge

parcham-e-kirdār ko apne agar kar leñ buland

phir to ham iblīs ko insān karte jā.eñge

us ghaḌī kyā ḳhuub manzar hogā sab ke sāmne

ḳhud ko jab un ke liye qurbān karte jā.eñge

pur-tajallī ruḳh pe un ke pyāsī nazreñ Daal kar

ham to apnī aañkh ko halkān karte jā.eñge

kah ke un ke husn par 'tasnīm' ik taaza ġhazal

huur aur pariyoñ ko bhī hairān karte jā.eñge

jannat-e-abaad ko viran karte jaenge

gulsitan ko pasban shamshan karte jaenge

KHana-e-jannat mein aadam-zad ka maskan na ho

is gharaz se KHud ko wo shaitan karte jaenge

tum laga kar aag gulshan ko bhale kar do tabah

hum to aatish-dan ko gul-dan karte jaenge

maut bhi parchhai ban kar samne jab aaegi

rafta-rafta us ko apni jaan karte jaenge

parcham-e-kirdar ko apne agar kar len buland

phir to hum iblis ko insan karte jaenge

us ghaDi kya KHub manzar hoga sab ke samne

KHud ko jab un ke liye qurban karte jaenge

pur-tajalli ruKH pe un ke pyasi nazren Dal kar

hum to apni aankh ko halkan karte jaenge

kah ke un ke husn par 'tasnim' ek taza ghazal

hur aur pariyon ko bhi hairan karte jaenge