janta ko sabz-bagh dikhaenge mil ke hum

jantā ko sabz-bāġh dikhā.eñge mil ke ham

har ik ko bevaqūf banā.eñge mil ke ham

tum dekhnā sabaq jo sikhā.eñge mil ke ham

bhārat ko apne nark banā.eñge mil ke ham

bharte raheñge apne gharoñ kī tijoriyāñ

kangāl is vatan ko banā.eñge mil ke ham

rahne na deñge dhartī ko hargiz harī-bharī

jo bhī bache haiñ peḌ kaTā.eñge mil ke ham

insān kyā hai dekh ke shaitān kaañp uThe

bhārat meñ aisī dhuum machā.eñge mil ke ham

tārīḳh apne aap ko dohrā.egī zarūr

vo din bhī sab ko jald dikhā.eñge mil ke ham

phir koī bhī bujhā na sakegā jise kabhī

duniyā meñ aisī aag lagā.eñge mil ke ham

lī thī shapat to dil meñ kiyā thā ye ahd bhī

dange fasād ḳhuub karā.eñge mil ke ham

janta ko sabz-bagh dikhaenge mil ke hum

har ek ko bewaquf banaenge mil ke hum

tum dekhna sabaq jo sikhaenge mil ke hum

bhaarat ko apne nark banaenge mil ke hum

bharte rahenge apne gharon ki tijoriyan

kangal is watan ko banaenge mil ke hum

rahne na denge dharti ko hargiz hari-bhari

jo bhi bache hain peD kaTaenge mil ke hum

insan kya hai dekh ke shaitan kanp uThe

bhaarat mein aisi dhum machaenge mil ke hum

tariKH apne aap ko dohraegi zarur

wo din bhi sab ko jald dikhaenge mil ke hum

phir koi bhi bujha na sakega jise kabhi

duniya mein aisi aag lagaenge mil ke hum

li thi shapat to dil mein kiya tha ye ahd bhi

dange fasad KHub karaenge mil ke hum