jashn-e-gham-e-hayat manane nahin diya

jashn-e-ġham-e-hayāt manāne nahīñ diyā

is muflisī ne zahr bhī khāne nahīñ diyā

ham ne jo sāda-lauhī meñ khāyā koī fareb

phir vo fareb auroñ ko khāne nahīñ diyā

āñdhī ne raushnī kī himāyat to kī bahut

lekin koī charāġh jalāne nahīñ diyā

ik-ādh ghar to jal gayā par shahr bach gayā

ab ke diye kā saath havā ne nahīñ diyā

raazī thā maiñ bhī aur mirā dushman bhī sulh par

kuchh dostoñ ne haath milāne nahīñ diyā

jashn-e-gham-e-hayat manane nahin diya

is muflisi ne zahr bhi khane nahin diya

hum ne jo sada-lauhi mein khaya koi fareb

phir wo fareb auron ko khane nahin diya

aandhi ne raushni ki himayat to ki bahut

lekin koi charagh jalane nahin diya

ik-adh ghar to jal gaya par shahr bach gaya

ab ke diye ka sath hawa ne nahin diya

raazi tha main bhi aur mera dushman bhi sulh par

kuchh doston ne hath milane nahin diya