jatan se rakh hamein jab tak ki ba-hayat hain hum

jatan se rakh hameñ jab tak ki bā-hayāt haiñ ham

tire badan kī riyāsat ke kāġhzāt haiñ ham

hameñ ḳharīdā thā sone ke bhaav meñ jis ne

ab us kī nazroñ meñ pītal ke zevarāt haiñ ham

ta'alluqāt kā nashsha utar chukā hai magar

abhī bhī lagtā hai ham ko tumhāre saath haiñ ham

jise samajh ke tujhe ishq kā hunar aaya

usī kitāb-e-mohabbat kī lafziyāt haiñ ham

usī ne rakkhā hai be-lutf hāshiye pe hameñ

vo jis qabīle kī aslī zarūriyāt haiñ ham

hameñ fuzūl idāroñ pe ḳharch mat karnā

mohabbatoñ ke safar se milī zakāt haiñ ham

jatan se rakh hamein jab tak ki ba-hayat hain hum

tere badan ki riyasat ke kaghzat hain hum

hamein KHarida tha sone ke bhaw mein jis ne

ab us ki nazron mein pital ke zewaraat hain hum

ta'alluqat ka nashsha utar chuka hai magar

abhi bhi lagta hai hum ko tumhaare sath hain hum

jise samajh ke tujhe ishq ka hunar aaya

usi kitab-e-mohabbat ki lafziyat hain hum

usi ne rakkha hai be-lutf hashiye pe hamein

wo jis qabile ki asli zaruriyat hain hum

hamein fuzul idaron pe KHarch mat karna

mohabbaton ke safar se mili zakat hain hum