jawab unki jafaon ka yun diya jae

javāb un kī jafāoñ kā yuuñ diyā jaa.e

diloñ se naqsh-e-vafā hī miTā diyā jaa.e

sarishk ḳhūn-e-jigar zahr yā sharāb ai dost

batā ye to ki tire ġham meñ kyā piyā jaa.e

jo koī chāk-e-garebāñ kahīñ mile yaaro

to apne tār-e-garebāñ se vo siyā jaa.e

kisī ke haath meñ ḳhanjar kisī hathelī pe sar

tumhāre shahr meñ ab kis tarah jiyā jaa.e

jahān-e-zar ke ḳhudāoñ se aaj ai 'rif.at'

hisāb-e-tishna-labī ab chukā liyā jaa.e

jawab un ki jafaon ka yun diya jae

dilon se naqsh-e-wafa hi miTa diya jae

sarishk KHun-e-jigar zahr ya sharab ai dost

bata ye to ki tere gham mein kya piya jae

jo koi chaak-e-gareban kahin mile yaro

to apne tar-e-gareban se wo siya jae

kisi ke hath mein KHanjar kisi hatheli pe sar

tumhaare shahr mein ab kis tarah jiya jae

jahan-e-zar ke KHudaon se aaj ai 'rifat'

hisab-e-tishna-labi ab chuka liya jae