jawani kar-farma-e-mohabbat hoti jati hai

javānī kār-farmā-e-mohabbat hotī jaatī hai

qayāmat meñ bapā taaza qayāmat hotī jaatī hai

mohabbat ā.ina-dār-e-haqīqat hotī jaatī hai

mirī nazroñ meñ har shai ḳhūbsūrat hotī jaatī hai

vahī haiñ roz-o-shab par tīra-qismat hotī jaatī hai

har ik sub.h-e-masarrat shām-e-hasrat hotī jaatī hai

har ik ḳhvāhish har ik ummīd ruḳhsat hotī jaatī hai

mohabbat ke liye un se mohabbat hotī jaatī hai

kabhī rāz-e-tarab kī justujū thī ab ye aalam hai

ḳhushī ke naam se bhī dil ko nafrat hotī jaatī hai

sukūñ to miT chukā betābiyāñ bhī miTtī jaatī haiñ

dil-e-zinda kī takmīl-e-shahādat hotī jaatī hai

rageñ khīñchtī haiñ dil siine se bāhar niklā aatā hai

gale mil mil ke un kī yaad ruḳhsat hotī jaatī hai

shikan laao jabīñ par yā nigāh-e-lutf se dekho

har ik sūrat mire miTne kī sūrat hotī jaatī hai

laḌakpan aur ehsās-e-javānī tauba hai tauba

kalī khilne se pahle mast-e-nik.hat hotī jaatī hai

mubārak husn-e-be-parvā ko be-parvā.iyāñ apnī

mohabbat aap ġham-ḳhvār-e-mohabbat hotī jaatī hai

jawani kar-farma-e-mohabbat hoti jati hai

qayamat mein bapa taza qayamat hoti jati hai

mohabbat aaina-dar-e-haqiqat hoti jati hai

meri nazron mein har shai KHubsurat hoti jati hai

wahi hain roz-o-shab par tira-qismat hoti jati hai

har ek subh-e-masarrat sham-e-hasrat hoti jati hai

har ek KHwahish har ek ummid ruKHsat hoti jati hai

mohabbat ke liye un se mohabbat hoti jati hai

kabhi raaz-e-tarab ki justuju thi ab ye aalam hai

KHushi ke nam se bhi dil ko nafrat hoti jati hai

sukun to miT chuka betabiyan bhi miTti jati hain

dil-e-zinda ki takmil-e-shahadat hoti jati hai

ragen khinchti hain dil sine se bahar nikla aata hai

gale mil mil ke un ki yaad ruKHsat hoti jati hai

shikan lao jabin par ya nigah-e-lutf se dekho

har ek surat mere miTne ki surat hoti jati hai

laDakpan aur ehsas-e-jawani tauba hai tauba

kali khilne se pahle mast-e-nikhat hoti jati hai

mubarak husn-e-be-parwa ko be-parwaiyan apni

mohabbat aap gham-KHwar-e-mohabbat hoti jati hai