jazb hone bhi na pae the hamare aansu

jazb hone bhī na paa.e the hamāre aañsū

yaad phir aa ga.e bhūle se tumhāre aañsū

ban hī jaate kabhī hastī ke sahāre aañsū

haa.e ruk hī na sake ham se hamāre aañsū

merī āñkhoñ meñ rahe vo to khaTakte hī rahe

un ke dāman pe bane chāñd-sitāre aañsū

TūTtī hai dil-e-ġham-ghīñ pe qayāmat kyā kyā

aa ke palkoñ pe jo rukte haiñ hamāre aañsū

ye na hote to qayāmat thā sahar tak jiinā

mere pyāre mirī rātoñ ke sahāre aañsū

azmat-e-ishq hai pābandī-e-zabt-e-furqat

ya.anī tauhīn-e-mohabbat haiñ hamāre aañsū

ek aañsū na bahā.ūñ ġham-e-duniyā ke liye

ġham-e-jānāñ ke liye haiñ mire saare aañsū

vo bhī kyā sā.at-e-rañgīñ thī ki jab ai 'maikash'

un ke āñchal meñ hue jazb hamāre aañsū

jazb hone bhi na pae the hamare aansu

yaad phir aa gae bhule se tumhaare aansu

ban hi jate kabhi hasti ke sahaare aansu

hae ruk hi na sake hum se hamare aansu

meri aankhon mein rahe wo to khaTakte hi rahe

un ke daman pe bane chand-sitare aansu

TuTti hai dil-e-gham-ghin pe qayamat kya kya

aa ke palkon pe jo rukte hain hamare aansu

ye na hote to qayamat tha sahar tak jina

mere pyare meri raaton ke sahaare aansu

azmat-e-ishq hai pabandi-e-zabt-e-furqat

yani tauhin-e-mohabbat hain hamare aansu

ek aansu na bahaun gham-e-duniya ke liye

gham-e-jaanan ke liye hain mere sare aansu

wo bhi kya saat-e-rangin thi ki jab ai 'maikash'

un ke aanchal mein hue jazb hamare aansu