jazba-e-ishq bhi hai garmi-e-bazar bhi hai

jazba-e-ishq bhī hai garmī-e-bāzār bhī hai

husn-e-yūsuf kā magar koī ḳharīdār bhī hai

sho.ala-e-tūr bhī hai jalva-gah-bār bhī hai

dekhnā ye hai koī tālib-e-dīdār bhī hai

dil kā saudā mujhe manzūr hai lekin ai dost

merā ham-zauq bhī hai mūnis-o-ġham-ḳhvār bhī hai

kabhī badle hue tevar kabhī duzdīda nazar

ek hī vaqt meñ iqrār bhī inkār bhī hai

pur-ziyā bazm-e-masarrat hai ziyā-e-ġham se

jis jagah phuul mahaktā hai vahāñ ḳhaar bhī hai

chashm-e-sāqī kā na mai-ḳhvār sahārā DhūñDeñ

vo suḳhan-sāz bhī hai aur jafā-kār bhī hai

merī duniyā meñ vahī shām-o-sahar haiñ ab tak

zindagī talḳh bhī hai aur girāñ-bār bhī hai

dil hathelī pe liye sar ko jhukā.e rahnā

un kā manshā bhī hai āshiq ko sazā-vār bhī hai

jab ġham-e-dil ko masīhā kī zarūrat hī nahīñ

ab maiñ samjhā huuñ ye ik uqda-e-dushvār bhī hai

'sājid'-e-ḳhasta ko āġhosh-e-karam meñ le le

terā banda bhī hai aur terā gunahgār bhī hai

jazba-e-ishq bhi hai garmi-e-bazar bhi hai

husn-e-yusuf ka magar koi KHaridar bhi hai

shoala-e-tur bhi hai jalwa-gah-bar bhi hai

dekhna ye hai koi talib-e-didar bhi hai

dil ka sauda mujhe manzur hai lekin ai dost

mera ham-zauq bhi hai munis-o-gham-KHwar bhi hai

kabhi badle hue tewar kabhi duzdida nazar

ek hi waqt mein iqrar bhi inkar bhi hai

pur-ziya bazm-e-masarrat hai ziya-e-gham se

jis jagah phul mahakta hai wahan KHar bhi hai

chashm-e-saqi ka na mai-KHwar sahaara DhunDen

wo suKHan-saz bhi hai aur jafa-kar bhi hai

meri duniya mein wahi sham-o-sahar hain ab tak

zindagi talKH bhi hai aur giran-bar bhi hai

dil hatheli pe liye sar ko jhukae rahna

un ka mansha bhi hai aashiq ko saza-war bhi hai

jab gham-e-dil ko masiha ki zarurat hi nahin

ab main samjha hun ye ek uqda-e-dushwar bhi hai

'sajid'-e-KHasta ko aaghosh-e-karam mein le le

tera banda bhi hai aur tera gunahgar bhi hai