jazba-e-ishq jo pindar se wabasta hai

jazba-e-'ishq jo pindār se vābasta hai

dar-haqīqat mire iqrār se vābasta hai

hai haqīqī ki majāzī nahīñ khultā ye raaz

silsila 'ishq kā asrār se vābasta hai

is ġhalat-fahmī ko tū dil se nikālegā kab

kāmyābī tirī dastār se vābasta hai

ek maḳhlūq zabānoñ se miTātī hai jise

ik qayāmat usī dīvār se vābasta hai

nau’-e-insān kī duniyā meñ taraqqī kā raaz

us kī ījād kī raftār se vābasta hai

ek insān kī duniyā meñ pazīrā.ī talak

us ke ḳhud apne hī kirdār se vābasta hai

har mohabbat kā ta'alluq sabhī rishtoñ kī baqā

dil ke jazbāt ke iz.hār se vābasta hai

jāgtī aañkh se firdaus-e-barīñ ab tak kyoñ

in damakte lab-o-ruḳhsār se vābasta hai

narm lafzoñ se utartī hai jo shabnam dil meñ

tere lahje tirī guftār se vābasta hai

bāñdh rakkhī hai faqat vālī-e-taiba se umiid

merī baḳhshish usī darbār se vābasta hai

aap ko aatā hai har sar ko jhukāne kā fan

ye hunar aap ke kirdār se vābasta hai

jiit yā haar kā kab ḳhatm tamāsha hogā

khel bas saañs kī raftār se vābasta hai

kyā parinde kabhī mahsūs kareñge 'shamsa'

hijr kā dard jo ashjār se vābasta hai

jazba-e-'ishq jo pindar se wabasta hai

dar-haqiqat mere iqrar se wabasta hai

hai haqiqi ki majazi nahin khulta ye raaz

silsila 'ishq ka asrar se wabasta hai

is ghalat-fahmi ko tu dil se nikalega kab

kaamyabi teri dastar se wabasta hai

ek maKHluq zabanon se miTati hai jise

ek qayamat usi diwar se wabasta hai

nau’-e-insan ki duniya mein taraqqi ka raaz

us ki ijad ki raftar se wabasta hai

ek insan ki duniya mein pazirai talak

us ke KHud apne hi kirdar se wabasta hai

har mohabbat ka ta'alluq sabhi rishton ki baqa

dil ke jazbaat ke izhaar se wabasta hai

jagti aankh se firdaus-e-barin ab tak kyon

in damakte lab-o-ruKHsar se wabasta hai

narm lafzon se utarti hai jo shabnam dil mein

tere lahje teri guftar se wabasta hai

bandh rakkhi hai faqat wali-e-taiba se umid

meri baKHshish usi darbar se wabasta hai

aap ko aata hai har sar ko jhukane ka fan

ye hunar aap ke kirdar se wabasta hai

jit ya haar ka kab KHatm tamasha hoga

khel bas sans ki raftar se wabasta hai

kya parinde kabhi mahsus karenge 'shamsa'

hijr ka dard jo ashjar se wabasta hai