jazba-e-ishq kam dikhata hun

jazba-e-'ishq kam dikhātā huuñ

jaan tujh par magar luTātā huuñ

yuuñ kisī ko nahīñ maiñ yaad aayā

maiñ bhī to sab ko bhuul jaatā huuñ

kaan bharte haiñ ek duuje ke

apne dushman ko maiñ hī bhātā huuñ

tere chehre se zulf kā pardā

apne hāthoñ se maiñ haTātā huuñ

baat kar luuñ hazār karne ko

maiñ hī ḳhud dūriyāñ baḌhātā huuñ

tujh se shikva bhī shā'irāna hai

yuuñ tujhe aa.ina dikhātā huuñ

hijr kī raat mujh pe hai bhārī

sub.h uThtā huuñ laḌkhaḌātā huuñ

vo mujhe chhoḌne hī vaalā hai

maiñ bhī nazdīkiyāñ miTātā huuñ

ḳhvāhish-e-vasl yuuñ nahīñ 'sāhil'

milne vāloñ se maat khātā huuñ

jazba-e-'ishq kam dikhata hun

jaan tujh par magar luTata hun

yun kisi ko nahin main yaad aaya

main bhi to sab ko bhul jata hun

kan bharte hain ek duje ke

apne dushman ko main hi bhata hun

tere chehre se zulf ka parda

apne hathon se main haTata hun

baat kar lun hazar karne ko

main hi KHud duriyan baDhata hun

tujh se shikwa bhi sha'irana hai

yun tujhe aaina dikhata hun

hijr ki raat mujh pe hai bhaari

subh uThta hun laDkhaData hun

wo mujhe chhoDne hi wala hai

main bhi nazdikiyan miTata hun

KHwahish-e-wasl yun nahin 'sahil'

milne walon se mat khata hun