jazba-e-shauq baDhata hai juda ho jaana

jazba-e-shauq baḌhātā hai judā ho jaanā

uuprī dil se zarā mujh se ḳhafā ho jaanā

qaus sajde meñ jhukī rah ga.ī jab se dekhā

un kī añgḌā.ī kā mehrāb-numā ho jaanā

dam kā kyā Thiik hai dam-bhar meñ hai dam-bhar meñ nahīñ

chalte phirte mirī bālīñ pe zarā ho jaanā

mausam-e-gul meñ unheñ ġhair idhar le aa.e

kaam aaya mire zaḳhmoñ kā harā ho jaanā

band hai 'ishq ke bandoñ ke liye āzādī

qaid hai qaid-e-mohabbat se rihā ho jaanā

un ke tevar bhī zarā dekhte rahnā qāsid

ḳhat ke purze jo nazar aa.eñ havā ho jaanā

khel hai hastī-e-fānī kā digar-gūñ ho kar

nuur meñ nuur fazāoñ meñ fazā ho jaanā

kuchh to ai rahmat-e-sāqī rahe 'kaifī' kā ḳhayāl

aa ke maiḳhāne pe chhānā to ghaTā ho jaanā

jazba-e-shauq baDhata hai juda ho jaana

upri dil se zara mujh se KHafa ho jaana

qaus sajde mein jhuki rah gai jab se dekha

un ki angDai ka mehrab-numa ho jaana

dam ka kya Thik hai dam-bhar mein hai dam-bhar mein nahin

chalte phirte meri baalin pe zara ho jaana

mausam-e-gul mein unhen ghair idhar le aae

kaam aaya mere zaKHmon ka hara ho jaana

band hai 'ishq ke bandon ke liye aazadi

qaid hai qaid-e-mohabbat se riha ho jaana

un ke tewar bhi zara dekhte rahna qasid

KHat ke purze jo nazar aaen hawa ho jaana

khel hai hasti-e-fani ka digar-gun ho kar

nur mein nur fazaon mein faza ho jaana

kuchh to ai rahmat-e-saqi rahe 'kaifi' ka KHayal

aa ke maiKHane pe chhana to ghaTa ho jaana