jazba-e-shauq jagaya to bura man gae

jazba-e-shauq jagāyā to burā maan ga.e

dil ne ik phuul khilāyā to burā maan ga.e

ahl-e-gulzār ne gulzār ko pāmāl kiyā

āshiyāñ ham ne jalāyā to burā maan ga.e

sham-e-umīd musībat meñ jalā kar ham ne

zulmat-e-ġham ko miTāyā to burā maan ga.e

apnī mahfil ko to hañs hañs ke sajāyā tum ne

ham ne kāshāna sajāyā to burā maan ga.e

log aate rahe jaate rahe mahfil meñ tirī

ham ne dushman ko haTāyā to burā maan ga.e

aap phūloñ ko bhī pāmāl kiyā karte the

ham ne kāñToñ ko haTāyā to burā maan ga.e

ab huā ilm ki vo ġhair samajhte the hameñ

un ko apnā jo banāyā to burā maan ga.e

sab kī fariyād sunī tum ne baḌe ġhaur ke saath

maiñ ne bhī haal sunāyā to burā maan ga.e

ishq kī raah meñ duniyā thī ravāñ ai 'shabbīr'

ik qadam ham ne uThāyā to burā maan ga.e

jazba-e-shauq jagaya to bura man gae

dil ne ek phul khilaya to bura man gae

ahl-e-gulzar ne gulzar ko pamal kiya

aashiyan hum ne jalaya to bura man gae

sham-e-umid musibat mein jala kar hum ne

zulmat-e-gham ko miTaya to bura man gae

apni mahfil ko to hans hans ke sajaya tum ne

hum ne kashana sajaya to bura man gae

log aate rahe jate rahe mahfil mein teri

hum ne dushman ko haTaya to bura man gae

aap phulon ko bhi pamal kiya karte the

hum ne kanTon ko haTaya to bura man gae

ab hua ilm ki wo ghair samajhte the hamein

un ko apna jo banaya to bura man gae

sab ki fariyaad suni tum ne baDe ghaur ke sath

main ne bhi haal sunaya to bura man gae

ishq ki rah mein duniya thi rawan ai 'shabbir'

ek qadam hum ne uThaya to bura man gae