jazba-e-shauq ka izhaar kahan hota hai

jazba-e-shauq kā iz.hār kahāñ hotā hai

yaañ haqīqat pe bhī ḳhvāboñ kā gumāñ hotā hai

ahd-e-tiflī meñ jise ziist kā hāsil jaanā

vaqt kā ab unhī bātoñ meñ ziyāñ hotā hai

tum hī aaoge mirī ruuh meñ ḳhushbū ban kar

ye tasavvur bhī ajab rāhat-e-jāñ hotā hai

raat palkoñ pe sajātā huuñ vafāoñ ke charāġh

din nikalne pe ye andāz kahāñ hotā hai

ishq-e-shorīda ko ashkoñ se tamāshā na banā

aag par paanī ke paḌne se dhuāñ hotā hai

merā mahbūb hai kyā pūchhne vaale ab pūchh

haañ ye 'manzar' bhī shab-o-roz vahāñ hotā hai

jazba-e-shauq ka izhaar kahan hota hai

yan haqiqat pe bhi KHwabon ka guman hota hai

ahd-e-tifli mein jise zist ka hasil jaana

waqt ka ab unhi baaton mein ziyan hota hai

tum hi aaoge meri ruh mein KHushbu ban kar

ye tasawwur bhi ajab rahat-e-jaan hota hai

raat palkon pe sajata hun wafaon ke charagh

din nikalne pe ye andaz kahan hota hai

ishq-e-shorida ko ashkon se tamasha na bana

aag par pani ke paDne se dhuan hota hai

mera mahbub hai kya puchhne wale ab puchh

han ye 'manzar' bhi shab-o-roz wahan hota hai