jazbaat-e-dil kabhi jo raqam kar diye gae

jazbāt-e-dil kabhī jo raqam kar diye ga.e

ahl-e-qalam ke haath qalam kar diye ga.e

ik roz ham bhī hoñge farāmosh jis tarah

pahle musāfirān-e-‘adam kar diye ga.e

yuuñ ehtimām-e-jashn-e-bahārāñ kiyā gayā

dāman guloñ ke ashkoñ se nam kar diye ga.e

vābastgān-e-dair-o-haram dekhte rahe

aur gul charāġh-e-dair-o-haram kar diye ga.e

majbūr tark-e-rasm-e-mohabbat ke vāste

tum kar diye ga.e kabhī ham kar diye ga.e

ai inqilāb khol de parcham ki sar-nigūñ

aglī sharāfatoñ ke 'alam kar diye ga.e

muñh meñ zabān rakhte hue be-zabān haiñ

ḳhāmosh kaise Dhang se ham kar diye ga.e

afsos jo tumhāre karam ke the mustahiq

un par hī ḳhatm saare sitam kar diye ga.e

tan se judā to ho ga.e lekin uThe nahīñ

sar is tarah bhī sajdoñ meñ ḳham kar diye ga.e

baaqī the apne paas jo qatrāt-e-ḳhūn-e-dil

vo sab supurd-e-nok-e-qalam kar diye ga.e

ab ḳhatm ho chukā haq-o-bātil kā imtiyāz

donoñ kuchh is tarah se baham kar diye ga.e

har āstāñ ko jin kī rahī justujū vo sar

ik āstān-e-nāz pe ḳham kar diye ga.e

had hai sitam-nasīboñ ko ye bhī ḳhabar nahīñ

kyā jurm thā jo vaqf-e-sitam kar diye ga.e

'rāhī' masarratoñ ke safīnoñ ko kyā huā

shāyad vo ġharq-e-bahr-e-alam kar diye ga.e

jazbaat-e-dil kabhi jo raqam kar diye gae

ahl-e-qalam ke hath qalam kar diye gae

ek roz hum bhi honge faramosh jis tarah

pahle musafiran-e-‘adam kar diye gae

yun ehtimam-e-jashn-e-bahaaran kiya gaya

daman gulon ke ashkon se nam kar diye gae

wabastgan-e-dair-o-haram dekhte rahe

aur gul charagh-e-dair-o-haram kar diye gae

majbur tark-e-rasm-e-mohabbat ke waste

tum kar diye gae kabhi hum kar diye gae

ai inqilab khol de parcham ki sar-nigun

agli sharafaton ke 'alam kar diye gae

munh mein zaban rakhte hue be-zaban hain

KHamosh kaise Dhang se hum kar diye gae

afsos jo tumhaare karam ke the mustahiq

un par hi KHatm sare sitam kar diye gae

tan se juda to ho gae lekin uThe nahin

sar is tarah bhi sajdon mein KHam kar diye gae

baqi the apne pas jo qatraat-e-KHun-e-dil

wo sab supurd-e-nok-e-qalam kar diye gae

ab KHatm ho chuka haq-o-baatil ka imtiyaz

donon kuchh is tarah se baham kar diye gae

har aastan ko jin ki rahi justuju wo sar

ek aastan-e-naz pe KHam kar diye gae

had hai sitam-nasibon ko ye bhi KHabar nahin

kya jurm tha jo waqf-e-sitam kar diye gae

'rahi' masarraton ke safinon ko kya hua

shayad wo gharq-e-bahr-e-alam kar diye gae