jazbaat ka KHamosh asar dekh raha hun

jazbāt kā ḳhāmosh asar dekh rahā huuñ

bechain hai dil aañkh ko tar dekh rahā huuñ

ḳhākistar-e-parvāna hai bujhtī huī sham.eñ

rañgīn mohabbat kī sahar dekh rahā huuñ

mauhūm huā jaatā hai ab maqsad-e-hastī

bātil ko haqīqat pe zabar dekh rahā huuñ

chhā.e haiñ kuchh is tarah mire dīda-o-dil par

har samt vahī haiñ maiñ jidhar dekh rahā huuñ

manzil kā pata hai na maqāmāt safar kā

tayyār hai ab raḳht-e-safar dekh rahā huuñ

jis raah se guzre the mohabbat ke musāfir

sunsān vahī rāhguzar dekh rahā huuñ

ai 'mauj' balā-ḳhez hai dariyā-e-mohabbat

tūfān kā aalam hai jidhar dekh rahā huuñ

jazbaat ka KHamosh asar dekh raha hun

bechain hai dil aankh ko tar dekh raha hun

KHakistar-e-parwana hai bujhti hui shamen

rangin mohabbat ki sahar dekh raha hun

mauhum hua jata hai ab maqsad-e-hasti

baatil ko haqiqat pe zabar dekh raha hun

chhae hain kuchh is tarah mere dida-o-dil par

har samt wahi hain main jidhar dekh raha hun

manzil ka pata hai na maqamat safar ka

tayyar hai ab raKHt-e-safar dekh raha hun

jis rah se guzre the mohabbat ke musafir

sunsan wahi rahguzar dekh raha hun

ai 'mauj' bala-KHez hai dariya-e-mohabbat

tufan ka aalam hai jidhar dekh raha hun