jehd-e-paiham ke hasin KHabt ko sar mein rakhna

jehd-e-paiham ke hasīñ ḳhabt ko sar meñ rakhnā

paañv thak jaa.eñ to sochoñ ko safar meñ rakhnā

rafta rafta vahī ban jaatā hai ghar kā mālik

kār-e-dushvār hai mehmān ko ghar meñ rakhnā

maiñ ḳhatā-kār ḳhatā hai mirī pahchān magar

vasf-e-insāñ hai farishtoñ ko nazar meñ rakhnā

azm-e-manzil na kahīñ bojh tale dab jaa.e

zād-e-rah hasb-e-zarūrat hī safar meñ rakhnā

bujhte bujhte jo sunā jaa.e kahānī shab kī

aisā anjum koī āġhosh-e-sahar meñ rakhnā

pakne se pahle samar koī zamīñ-bos na ho

aisā andāz-e-numū tuḳhm-e-shajar meñ rakhnā

jān-levā hai jo shāḳhoñ pe musallat hai sukūt

hausla ḳhaar kā phūloñ ke nagar meñ rakhnā

jehd-e-paiham ke hasin KHabt ko sar mein rakhna

panw thak jaen to sochon ko safar mein rakhna

rafta rafta wahi ban jata hai ghar ka malik

kar-e-dushwar hai mehman ko ghar mein rakhna

main KHata-kar KHata hai meri pahchan magar

wasf-e-insan hai farishton ko nazar mein rakhna

azm-e-manzil na kahin bojh tale dab jae

zad-e-rah hasb-e-zarurat hi safar mein rakhna

bujhte bujhte jo suna jae kahani shab ki

aisa anjum koi aaghosh-e-sahar mein rakhna

pakne se pahle samar koi zamin-bos na ho

aisa andaz-e-numu tuKHm-e-shajar mein rakhna

jaan-lewa hai jo shaKHon pe musallat hai sukut

hausla KHar ka phulon ke nagar mein rakhna