jhagDe raha kiye dil-e-shorida-sar ke sath

jhagḌe rahā kiye dil-e-shorīda-sar ke saath

dushvār ho gayā safar us ham-safar ke saath

nekī badī hai roz-e-azal se bashar ke saath

insān kā ḳhamīr banā ḳhair-o-shar ke saath

dil kī bhī ḳhair maañg rahā huuñ jigar kī bhī

donoñ kī taak meñ haiñ vo tirchhī nazar ke saath

hir-phir ke kyoñ na aa.e mire dil meñ us kī naaz

hotā hai uns sab ko zarūr apne ghar ke saath

ai sail-e-ashk ḳhāna-e-dushman bhī paas hai

kyoñ tujh ko buġhz hai mirī dīvār-o-dar ke saath

chaurang kāTtī hai vo teġh-e-nigāh-e-nāz

armānoñ kā bhī ḳhuun huā dil jigar ke saath

kal jis galī meñ kho chuke dil phir vahīñ chale

dil-bastagī kuchh aisī hai us rahguzar ke saath

hamrāh-e-ḳhizr jā ke sikandar ko kyā milā

qismat hai har bashar kī judā har bashar ke saath

jab tak ye dil hai dil se na jā.egā terā ishq

jab tak ye sar hai zulfoñ kā saudā hai sar ke saath

fard-e-gunah ko dho.eñge ye ashk-e-infi.āl

vābasta hai umiid mirī chashm-e-tar ke saath

kyā ḳhvāb meñ vo kākul-e-mushkīñ bikhar ga.iiñ

aa.ī jo bū-e-mushk nasīm-e-sahar ke saath

hamrāh vo raqīboñ ke niklā hai sair ko

sau fitne ham-rikāb haiñ us fitna-gar ke saath

kyā jaane le chalā hai hameñ josh-e-be-ḳhudī

rahzan ke saath jaate haiñ yā rāhbar ke saath

kyā mujh ko us ke va.ada-e-mashrūt kī ḳhushī

ahd-e-vafā kiyā hai magar aur agar ke saath

dhokā hai āqibat kā ba-qaul-e-sabā 'ḳhayāl'

anjām ho ba-ḳhair ki shar hai bashar ke saath

jhagDe raha kiye dil-e-shorida-sar ke sath

dushwar ho gaya safar us ham-safar ke sath

neki badi hai roz-e-azal se bashar ke sath

insan ka KHamir bana KHair-o-shar ke sath

dil ki bhi KHair mang raha hun jigar ki bhi

donon ki tak mein hain wo tirchhi nazar ke sath

hir-phir ke kyon na aae mere dil mein us ki naz

hota hai uns sab ko zarur apne ghar ke sath

ai sail-e-ashk KHana-e-dushman bhi pas hai

kyon tujh ko bughz hai meri diwar-o-dar ke sath

chaurang kaTti hai wo tegh-e-nigah-e-naz

armanon ka bhi KHun hua dil jigar ke sath

kal jis gali mein kho chuke dil phir wahin chale

dil-bastagi kuchh aisi hai us rahguzar ke sath

hamrah-e-KHizr ja ke sikandar ko kya mila

qismat hai har bashar ki juda har bashar ke sath

jab tak ye dil hai dil se na jaega tera ishq

jab tak ye sar hai zulfon ka sauda hai sar ke sath

fard-e-gunah ko dhoenge ye ashk-e-infial

wabasta hai umid meri chashm-e-tar ke sath

kya KHwab mein wo kakul-e-mushkin bikhar gain

aai jo bu-e-mushk nasim-e-sahar ke sath

hamrah wo raqibon ke nikla hai sair ko

sau fitne ham-rikab hain us fitna-gar ke sath

kya jaane le chala hai hamein josh-e-be-KHudi

rahzan ke sath jate hain ya rahbar ke sath

kya mujh ko us ke wada-e-mashrut ki KHushi

ahd-e-wafa kiya hai magar aur agar ke sath

dhoka hai aaqibat ka ba-qaul-e-saba 'KHayal'

anjam ho ba-KHair ki shar hai bashar ke sath