jhalak bhi mil na pai zindagi ki

jhalak bhī mil na paa.ī zindagī kī

use jaldī paḌī thī vāpsī kī

bachāo apnī jaltī bastiyoñ ko

bahut tā'rīf kar lī raushnī kī

ḳhudāoñ se bhī gahrī chhan rahī hai

mire jaise fasādī aadmī kī

vo bole hañste-hañste marte jaao

'ajab ye shart hai zinda-dilī kī

añdheroñ ne bhī chamkāyā na ham ko

charāġhoñ ne bhī ham se dil-lagī kī

luTāte ho jo itnā pyaar mujh par

tumheñ pahchān bhī hai aadmī kī

kabhī fursat mile to baat karnā

zarūrat hai zarā sī zindagī kī

kahīñ ye tanz to mujh par nahīñ hai

qasam khāte ho har dam 'āshiqī kī

na.ī masrūfiyat paidā kare kaun

kise fursat hai banda-parvarī kī

jhalak bhi mil na pai zindagi ki

use jaldi paDi thi wapsi ki

bachao apni jalti bastiyon ko

bahut ta'rif kar li raushni ki

KHudaon se bhi gahri chhan rahi hai

mere jaise fasadi aadmi ki

wo bole hanste-hanste marte jao

'ajab ye shart hai zinda-dili ki

andheron ne bhi chamkaya na hum ko

charaghon ne bhi hum se dil-lagi ki

luTate ho jo itna pyar mujh par

tumhein pahchan bhi hai aadmi ki

kabhi fursat mile to baat karna

zarurat hai zara si zindagi ki

kahin ye tanz to mujh par nahin hai

qasam khate ho har dam 'ashiqi ki

nai masrufiyat paida kare kaun

kise fursat hai banda-parwari ki