jhankar ka rishta to hai zanjir se sain

jhankār kā rishta to hai zanjīr se sā.īñ

kyoñ log pareshāñ hue ta.abīr se sā.īñ

kuchh log abhī shahr meñ aise bhī haiñ ḳhush-posh

jo aag lagā dete haiñ taqrīr se sā.īñ

haq bolne kā hausla ab ham meñ nahīñ hai

nisbat to nikaltī rahī shabbīr se sā.īñ

tadbīr pe mauqūf hai duniyā kī hukūmat

ham log ulajhte rahe taqdīr se sā.īñ

rahne do abhī ā.ina-ḳhāne meñ koī aks

kuchh dil to bahal jaatā hai tasvīr se sā.īñ

pahle hī bahut der huī aane meñ un ke

ab jaan nikal jā.egī tāḳhīr se sā.īñ

tadbīr kuchh aisī karo ulfat ke nigahbāñ

bichhḌe na koī rāñjhā kisī hiir se sā.īñ

jhankar ka rishta to hai zanjir se sain

kyon log pareshan hue tabir se sain

kuchh log abhi shahr mein aise bhi hain KHush-posh

jo aag laga dete hain taqrir se sain

haq bolne ka hausla ab hum mein nahin hai

nisbat to nikalti rahi shabbir se sain

tadbir pe mauquf hai duniya ki hukumat

hum log ulajhte rahe taqdir se sain

rahne do abhi aaina-KHane mein koi aks

kuchh dil to bahal jata hai taswir se sain

pahle hi bahut der hui aane mein un ke

ab jaan nikal jaegi taKHir se sain

tadbir kuchh aisi karo ulfat ke nigahban

bichhDe na koi ranjha kisi hir se sain