jhel kar dukh mujhe jine ka qarina aaya

jhel kar dukh mujhe jiine kā qarīna aaya

na jabīñ par shikan ubhrī na pasīna aaya

kitne alfāz-o-tarākīb tarāshe maiñ ne

guftugū kā na salīqa na qarīna aaya

muddatoñ maiñ ne kiyā hai dil-e-sad-chāk rafū

tab kahīñ jā ke mujhe zaḳhm kā siina aaya

mujh ko honā paḌā mamnūn-e-karam maujoñ kā

kitnī mushkil se kināre pe safīna aaya

maiñ ne shikva na kiyā terī jafāoñ kā kabhī

saaf dil thā ki mire dil meñ na kiina aaya

phir na.e saal kī aamad pe qasīda likhkhūñ

ḳhatm hone ko december kā mahīna aaya

maiñ ne vo rāz-e-haqīqat kabhī ifshā na kiyā

jo mire paas 'asar' sīna-ba-sīna aaya

jhel kar dukh mujhe jine ka qarina aaya

na jabin par shikan ubhri na pasina aaya

kitne alfaz-o-tarakib tarashe main ne

guftugu ka na saliqa na qarina aaya

muddaton main ne kiya hai dil-e-sad-chaak rafu

tab kahin ja ke mujhe zaKHm ka sina aaya

mujh ko hona paDa mamnun-e-karam maujon ka

kitni mushkil se kinare pe safina aaya

main ne shikwa na kiya teri jafaon ka kabhi

saf dil tha ki mere dil mein na kina aaya

phir nae sal ki aamad pe qasida likhkhun

KHatm hone ko december ka mahina aaya

main ne wo raaz-e-haqiqat kabhi ifsha na kiya

jo mere pas 'asar' sina-ba-sina aaya