jhiDki nahin dete hain ki ghussa nahin hota

jhiḌkī nahīñ dete haiñ ki ġhussa nahīñ hotā

āshiq pe sitam vasl meñ kyā kyā nahīñ hotā

badnām huā karte haiñ go ishq meñ āshiq

par merī tarah koī bhī rusvā nahīñ hotā

juz sharbat-e-dīdār karo laakh davā.eñ

bīmār-e-mohabbat kabhī achchhā nahīñ hotā

ḳhalḳhāl kī āvāz se chauñk uThte haiñ murde

kab hashr tire kūche meñ barpā nahīñ hotā

bād-e-saharī se koī ġhuncha nahīñ khiltā

jab tak ki tirā band-e-qabā vā nahīñ hotā

rahtā hai tasavvur jo ik ā.īna-jabīñ kā

hairat nahīñ hotī hai ki sakta nahīñ hotā

kab yaar ke mizhgāñ kā tasavvur nahīñ 'vahbī'

kab jism mirā suukh ke kāñTā nahīñ hotā

jhiDki nahin dete hain ki ghussa nahin hota

aashiq pe sitam wasl mein kya kya nahin hota

badnam hua karte hain go ishq mein aashiq

par meri tarah koi bhi ruswa nahin hota

juz sharbat-e-didar karo lakh dawaen

bimar-e-mohabbat kabhi achchha nahin hota

KHalKHal ki aawaz se chaunk uThte hain murde

kab hashr tere kuche mein barpa nahin hota

baad-e-sahari se koi ghuncha nahin khilta

jab tak ki tera band-e-qaba wa nahin hota

rahta hai tasawwur jo ek aaina-jabin ka

hairat nahin hoti hai ki sakta nahin hota

kab yar ke mizhgan ka tasawwur nahin 'wahbi'

kab jism mera sukh ke kanTa nahin hota