jhil ke par dhanak-rang saman hai kaisa

jhiil ke paar dhanak-rañg samāñ hai kaisā

jhilmilātā huā vo aks vahāñ hai kaisā

jalte bujhte hue fānūs haiñ manzar manzar

naqsh-dar-naqsh vo miT kar bhī ayaañ hai kaisā

kitne alfāz-o-ma.ānī ke varaq khulte haiñ

mere andar ye kitāboñ kā jahāñ hai kaisā

mujh meñ ab merī jagah aur koī hai shāyad

kuchh samajh meñ nahīñ aatā ye gumāñ hai kaisā

shahr se lauT ke ghar qarz chukānā hai mujhe

kaise likkhūñ ki mirā haal yahāñ hai kaisā

kis ne Daalī hai fazāoñ pe ye mailī chādar

shab ke māthe pe lahū-rañg nishāñ hai kaisā

muTThiyāñ bhej ke ham log rahe haiñ kab se

duur tak aag kā jañgal hai samāñ hai kaisā

mere ajdād ke to ḳhvāb yahāñ dafn nahīñ

ye havelī ye pur-asrār dhuāñ hai kaisā

qabreñ bhī us meñ nahīñ tāj-mahal kī sūrat

koī ābād nahīñ hai ye makāñ hai kaisā

jhil ke par dhanak-rang saman hai kaisa

jhilmilata hua wo aks wahan hai kaisa

jalte bujhte hue fanus hain manzar manzar

naqsh-dar-naqsh wo miT kar bhi ayan hai kaisa

kitne alfaz-o-maani ke waraq khulte hain

mere andar ye kitabon ka jahan hai kaisa

mujh mein ab meri jagah aur koi hai shayad

kuchh samajh mein nahin aata ye guman hai kaisa

shahr se lauT ke ghar qarz chukana hai mujhe

kaise likkhun ki mera haal yahan hai kaisa

kis ne Dali hai fazaon pe ye maili chadar

shab ke mathe pe lahu-rang nishan hai kaisa

muTThiyan bhej ke hum log rahe hain kab se

dur tak aag ka jangal hai saman hai kaisa

mere ajdad ke to KHwab yahan dafn nahin

ye haweli ye pur-asrar dhuan hai kaisa

qabren bhi us mein nahin taj-mahal ki surat

koi aabaad nahin hai ye makan hai kaisa