jhijak shoKHi haya waisi ki waisi

jhijak shoḳhī hayā vaisī kī vaisī

hai us kī har adā vaisī kī vaisī

falak se ho ke nā-manzūr apnī

palaT aa.ī duā vaisī kī vaisī

ḳhushī ko bārhā ham ne manāyā

rahī ham se ḳhafā vaisī kī vaisī

vafā kī laakh ham ne zindagī se

rahī ye bevafā vaisī kī vaisī

judā ham ek muddat se haiñ lekin

judā.ī kī sazā vaisī kī vaisī

bikharne par bhī hai mahfūz ab tak

fazā meñ har sadā vaisī kī vaisī

na badlegī kabhī bātoñ se qismat

rahegī dekhnā vaisī kī vaisī

jo āġhāz-e-mohabbat meñ paḌhī thī

ġhazal mutrib sunā vaisī kī vaisī

jo aa.ī kal mirī niyyat badalne

ghirī phir se ghaTā vaisī kī vaisī

javānī ke tamannā.ī javānī

kahāñ se pā.egā vaisī kī vaisī

hamārī kashti-e-dil bahr-e-ġham meñ

phire be-āsrā vaisī kī vaisī

jahāñ se aa.ī hai ai umr-e-fānī

vahīñ par lauT jā vaisī kī vaisī

jhijak shoKHi haya waisi ki waisi

hai us ki har ada waisi ki waisi

falak se ho ke na-manzur apni

palaT aai dua waisi ki waisi

KHushi ko barha hum ne manaya

rahi hum se KHafa waisi ki waisi

wafa ki lakh hum ne zindagi se

rahi ye bewafa waisi ki waisi

juda hum ek muddat se hain lekin

judai ki saza waisi ki waisi

bikharne par bhi hai mahfuz ab tak

faza mein har sada waisi ki waisi

na badlegi kabhi baaton se qismat

rahegi dekhna waisi ki waisi

jo aaghaz-e-mohabbat mein paDhi thi

ghazal mutrib suna waisi ki waisi

jo aai kal meri niyyat badalne

ghiri phir se ghaTa waisi ki waisi

jawani ke tamannai jawani

kahan se paega waisi ki waisi

hamari kashti-e-dil bahr-e-gham mein

phire be-asra waisi ki waisi

jahan se aai hai ai umr-e-fani

wahin par lauT ja waisi ki waisi