jhonke ki tarah umr-e-do-roza guzar gai

jhoñke kī tarah umr-e-do-roza guzar ga.ī

jaane kidhar se aa.ī thī jaane kidhar ga.ī

is tarah dil tak aaj kisī kī nazar ga.ī

dam bhar ThiThak ke umr-e-gurezāñ Thahar ga.ī

afsāna-e-hayāt kī rangīniyāñ na pūchh

itnī hai umr baḌh ga.ī jitnī guzar ga.ī

sau inqalāb muntazir ik barhamī ke the

bikhrī jo un kī zulf to duniyā sañvar ga.ī

ham tolte rahe par-o-bāzū-e-ārzū

itne meñ iltifāt kī saa.at guzar ga.ī

rakkheñ ab ahl-e-hosh qadam phūñk phūñk kar

apnī to jis tarīq pe guzrī guzar ga.ī

bālīñ pe jalva-rez hai husn-e-latīf-e-dost

'fayyāz' aañkh khol namāz-e-sahar ga.ī

jhonke ki tarah umr-e-do-roza guzar gai

jaane kidhar se aai thi jaane kidhar gai

is tarah dil tak aaj kisi ki nazar gai

dam bhar ThiThak ke umr-e-gurezan Thahar gai

afsana-e-hayat ki ranginiyan na puchh

itni hai umr baDh gai jitni guzar gai

sau inqalab muntazir ek barhami ke the

bikhri jo un ki zulf to duniya sanwar gai

hum tolte rahe par-o-bazu-e-arzu

itne mein iltifat ki saat guzar gai

rakkhen ab ahl-e-hosh qadam phunk phunk kar

apni to jis tariq pe guzri guzar gai

baalin pe jalwa-rez hai husn-e-latif-e-dost

'fayyaz' aankh khol namaz-e-sahar gai