jhuk sake aap ka ye sar to jhuka kar dekhen

jhuk sake aap kā ye sar to jhukā kar dekheñ

raah meñ dil hai ki patthar hai uThā kar dekheñ

ye bhī ik shart hai takmīl-e-hikāyat ke liye

hāl-o-mustaqbil-o-māzī ko milā kar dekheñ

aabrū husn kī ho jaa.e na pāmāl-e-nazar

dekhnā ho to uTheñ ḳhud se chhupā kar dekheñ

ġhairat-e-zuhra-vshāñ rashk-e-qamar haiñ ki nahīñ

aao in ḳhaak ke zarroñ ko uThā kar dekheñ

ab nahīñ milne ke duniyā meñ vo ḳhāsān-e-junūñ

laakh ham ahl-e-ḳhirad sham.a jalā kar dekheñ

un hijāboñ ko jo mānūs-e-azal haiñ ab tak

aao fitrat kī nigāhoñ meñ samā kar dekheñ

ḳhud hī khul jā.egā arbāb-e-gulistāñ kā bharam

chheḌ kar gul ko to ġhunchoñ ko hañsā kar dekheñ

zindagī dard sarāpā hī nahīñ pyaar bhī hai

aao is pyaar ko naġhmoñ meñ sajā kar dekheñ

kyā atā hotī hai kyā ajr-o-sila miltā hai

ai 'razā' dast-e-talab ham bhī baḌhā kar dekheñ

jhuk sake aap ka ye sar to jhuka kar dekhen

rah mein dil hai ki patthar hai uTha kar dekhen

ye bhi ek shart hai takmil-e-hikayat ke liye

haal-o-mustaqbil-o-mazi ko mila kar dekhen

aabru husn ki ho jae na pamal-e-nazar

dekhna ho to uThen KHud se chhupa kar dekhen

ghairat-e-zuhra-wshan rashk-e-qamar hain ki nahin

aao in KHak ke zarron ko uTha kar dekhen

ab nahin milne ke duniya mein wo KHasan-e-junun

lakh hum ahl-e-KHirad shama jala kar dekhen

un hijabon ko jo manus-e-azal hain ab tak

aao fitrat ki nigahon mein sama kar dekhen

KHud hi khul jaega arbab-e-gulistan ka bharam

chheD kar gul ko to ghunchon ko hansa kar dekhen

zindagi dard sarapa hi nahin pyar bhi hai

aao is pyar ko naghmon mein saja kar dekhen

kya ata hoti hai kya ajr-o-sila milta hai

ai 'raza' dast-e-talab hum bhi baDha kar dekhen