jhuka ke sar na yun daman bachana chahiye tha

jhukā ke sar na yuuñ dāman bachānā chāhiye thā

anā par aa ga.ī thī sar kaTānā chāhiye thā

huā hamvār dariyā thā shanāvar kā muqaddar

huā vo paar jis ko Duub jaanā chāhiye thā

nasīhat kā tirī ye zāviya kuchh aur hotā

miyāñ nāseh tujhe bhī dil lagānā chāhiye thā

mashaqqat se badalnī thī hathelī ki lakīreñ

muqaddar haath meñ thā āzmānā chāhiye thā

tere sar par jo pagḌī hai mire ajdād kī hai

mirī tāzīm meñ ye sar jhukānā chāhiye thā

dar-e-jānāñ dar-e-jānāñ nazar aatā thā har-sū

jabīñ betāb thī us ko Thikānā chāhiye thā

maiñ ḳhud ko yaad thā merī mohabbat meñ kamī thī

tirī qurbat meñ ḳhud ko bhuul jaanā chāhiye thā

hamesha hī rahī an-ban kisī 'dānish' se us kī

mire jaisā use pāgal dīvāna chāhiye thā

tamāsha thī jo 'dānish' zindagī to dekh letā

jo naġhma thī to us ko gungunānā chāhiye thā

fasāna ban ga.ī thī zindagānī gar jo 'dānish'

use izzat se sunñā thā sunānā chāhiye thā

jhuka ke sar na yun daman bachana chahiye tha

ana par aa gai thi sar kaTana chahiye tha

hua hamwar dariya tha shanawar ka muqaddar

hua wo par jis ko Dub jaana chahiye tha

nasihat ka teri ye zawiya kuchh aur hota

miyan naseh tujhe bhi dil lagana chahiye tha

mashaqqat se badalni thi hatheli ki lakiren

muqaddar hath mein tha aazmana chahiye tha

tere sar par jo pagDi hai mere ajdad ki hai

meri tazim mein ye sar jhukana chahiye tha

dar-e-jaanan dar-e-jaanan nazar aata tha har-su

jabin betab thi us ko Thikana chahiye tha

main KHud ko yaad tha meri mohabbat mein kami thi

teri qurbat mein KHud ko bhul jaana chahiye tha

hamesha hi rahi an-ban kisi 'danish' se us ki

mere jaisa use pagal diwana chahiye tha

tamasha thi jo 'danish' zindagi to dekh leta

jo naghma thi to us ko gungunana chahiye tha

fasana ban gai thi zindagani gar jo 'danish'

use izzat se sunna tha sunana chahiye tha