جھکتے نہیں سر یوں کسی شمشیر کے آگے

جھکتے نہیں سر یوں کسی شمشیر کے آگے

بس چلتا نہیں کوئی بھی تقدیر کے آگے

اس کا کوئی بندھن تو نہ تھا راہ وفا میں

خود پاؤں مرے آ گئے زنجیر کے آگے

اف تیری نظر بھی تو قیامت کی نظر تھی

دل کیسے بچاتا کوئی اس تیر کے آگے

گھبراتا ہے تنہائی کی راتوں سے مرا دل

روتا ہوں میں گھنٹوں تیری تصویر کے آگے

آ جائے گا الفت کا یقیں ان کو یقیناً

رکھ دوں گا کسی روز جگر چیر کے آگے

بدلا نہ میرا رنج و الم ہائے رے قسمت

دل اور مچل جاتا ہے دلگیر کے آگے

مانا کہ تری زندگی آساں نہیں عالمؔ

مشکل بھی تو مشکل نہیں تدبیر کے آگے