jhuT kahun to dil tayyar nahin hota

jhuuT kahūñ to dil tayyār nahīñ hotā

sach se lekin beḌā paar nahīñ hotā

aap naf.a meñ ḳhush haiñ ham ghāTe meñ ḳhush

rishtoñ kā ham se bevpār nahīñ hotā

raam kī shabrī jañgal meñ to rahtī hai

beroñ par us kā adhikār nahīñ hotā

sab keval apnī kamzorī jiite haiñ

rishta to koī bīmār nahīñ hotā

sunñā sahnā chup rahnā phir hañsnā bhī

ḳhud pe itnā attyāchār nahīñ hotā

ḳhud se Darnā kashtī pe bhī shak karnā

ab aise to dariyā paar nahīñ hotā

ye sach hai vo har hafte hī aatā hai

sab kī qismat meñ itvār nahīñ hotā

sīdhe sachche achchhe bhī haiñ log bahut

kaise likh duuñ do do chaar nahīñ hotā

jhuT kahun to dil tayyar nahin hota

sach se lekin beDa par nahin hota

aap nafa mein KHush hain hum ghaTe mein KHush

rishton ka hum se bewpar nahin hota

ram ki shabri jangal mein to rahti hai

beron par us ka adhikar nahin hota

sab kewal apni kamzori jite hain

rishta to koi bimar nahin hota

sunna sahna chup rahna phir hansna bhi

KHud pe itna attyachaar nahin hota

KHud se Darna kashti pe bhi shak karna

ab aise to dariya par nahin hota

ye sach hai wo har hafte hi aata hai

sab ki qismat mein itwar nahin hota

sidhe sachche achchhe bhi hain log bahut

kaise likh dun do do chaar nahin hota