jhuTe ishq ka jazba der tak nahin rahta

jhūTe 'ishq kā jazba der tak nahīñ rahtā

ret par banā naqsha der tak nahīñ rahtā

sach to ye hai aksar vo mujh se ruuTh jaatā hai

lekin us kā ye ġhussa der tak nahīñ rahtā

ye ḳhudā kī qudrat hai baa'd paidā hone ke

maañ ke duudh bin bachcha der tak nahīñ rahtā

jitnī jald mumkin ho dekhne chale aao

mere gaañv kā mela der tak nahīñ rahtā

jhūTī shān-o-shaukat par mat ġhurūr kar nādāñ

daulatoñ kā ye nashsha der tak nahīñ rahtā

rāh-e-'ishq meñ vo jo ibtidā meñ hotā hai

'āshiqī kā vo nashsha der tak nahīñ rahtā

sach kaho hamesha tum kyūñki 'shāhruḳh'-sāhil'

jhuuT par Tikā rishta der tak nahīñ rahtā

jhuTe 'ishq ka jazba der tak nahin rahta

ret par bana naqsha der tak nahin rahta

sach to ye hai aksar wo mujh se ruTh jata hai

lekin us ka ye ghussa der tak nahin rahta

ye KHuda ki qudrat hai ba'd paida hone ke

man ke dudh bin bachcha der tak nahin rahta

jitni jald mumkin ho dekhne chale aao

mere ganw ka mela der tak nahin rahta

jhuTi shan-o-shaukat par mat ghurur kar nadan

daulaton ka ye nashsha der tak nahin rahta

rah-e-'ishq mein wo jo ibtida mein hota hai

'ashiqi ka wo nashsha der tak nahin rahta

sach kaho hamesha tum kyunki 'shahruKH'-sahil'

jhuT par Tika rishta der tak nahin rahta