jhuTi tasalliyon pe guzar kar rahe hain log

jhūTī tasalliyoñ pe guzar kar rahe haiñ log

kāġhaz kī kashtiyoñ meñ safar kar rahe haiñ log

ab bhī haiñ shab-gazīda sahar kī tajalliyāñ

nādāñ haiñ etibār-e-nazar kar rahe haiñ log

kyā apne bāzuoñ pe bharosā nahīñ rahā

kyoñ bebasī se ziist basar kar rahe haiñ log

gulshan-parastiyoñ pe na harf aa.e dosto

maanā fazā ko zahr-asar kar rahe haiñ log

lagtā hai koī ḳhvāb sunahre dikhā gayā

shiddat se intizār-e-sahar kar rahe haiñ log

pahle daraḳht-e-ḳhurma se saa.e kā thā gila

bargad se ab umīd-e-samar kar rahe haiñ log

'tālib' kise hai aaj suḳhan-fahmiyoñ se kaam

kyoñ ārzū-e-dād-e-hunar kar rahe haiñ log

jhuTi tasalliyon pe guzar kar rahe hain log

kaghaz ki kashtiyon mein safar kar rahe hain log

ab bhi hain shab-gazida sahar ki tajalliyan

nadan hain etibar-e-nazar kar rahe hain log

kya apne bazuon pe bharosa nahin raha

kyon bebasi se zist basar kar rahe hain log

gulshan-parastiyon pe na harf aae dosto

mana faza ko zahr-asar kar rahe hain log

lagta hai koi KHwab sunahre dikha gaya

shiddat se intizar-e-sahar kar rahe hain log

pahle daraKHt-e-KHurma se sae ka tha gila

bargad se ab umid-e-samar kar rahe hain log

'talib' kise hai aaj suKHan-fahmiyon se kaam

kyon aarzu-e-dad-e-hunar kar rahe hain log