jidhar teri nigah-e-kaif-bar guzri hai

jidhar tirī nigah-e-kaif-bār guzrī hai

udhar se rahmat-e-parvardigār guzrī hai

vo zindagī to sarāpā-bahār guzrī hai

jo rāh-e-ishq meñ mastānā-vār guzrī hai

ik aisā vaqt bhī aayā hai rāh-e-ulfat meñ

mirī hayāt mujhe nāgavār guzrī hai

jahāñ pe hazrat-e-jibra.īl par na maar sake

vahāñ se merī nazar baar baar guzrī hai

sajā huā thā sitāroñ se dāman-e-hastī

shab-e-firāq baḌī shāndār guzrī hai

kahīñ se DhūñDh ke lā de vo raat ai nāseh

jo un ke saath lab-e-jū-e-bār guzrī hai

guzar gayā huuñ junūñ meñ jidhar se ai 'muḳhtār'

udhar se bāġh-e-jināñ kī bahār guzrī hai

jidhar teri nigah-e-kaif-bar guzri hai

udhar se rahmat-e-parwardigar guzri hai

wo zindagi to sarapa-bahaar guzri hai

jo rah-e-ishq mein mastana-war guzri hai

ek aisa waqt bhi aaya hai rah-e-ulfat mein

meri hayat mujhe nagawar guzri hai

jahan pe hazrat-e-jibrail par na mar sake

wahan se meri nazar bar bar guzri hai

saja hua tha sitaron se daman-e-hasti

shab-e-firaq baDi shandar guzri hai

kahin se DhunDh ke la de wo raat ai naseh

jo un ke sath lab-e-ju-e-bar guzri hai

guzar gaya hun junun mein jidhar se ai 'muKHtar'

udhar se bagh-e-jinan ki bahaar guzri hai