jigar ke chaak pe raqsan ye pyar ki miTTi

jigar ke chaak pe raqsāñ ye pyaar kī miTTī

mahak rahī hai tire intizār kī miTTī

shikasta hijr ke mausam meñ ham ne dekhī hai

ḳhizāñ kī shakl meñ fasl-e-bahār kī miTTī

guzarte vaqt kī mānind mere hāthoñ se

phisal na jaa.e tire e.atibār kī miTTī

maiñ us ke badle meñ de duuñ jahān kī daulat

kahīñ mile jo mujhe kū-e-yār kī miTTī

lagī hai bhiiḌ farishtoñ kī ḳhair-maqdam ko

zarūr hai ye kisī dīn-dār kī miTTī

kise ḳhabar hai ki hijrat kī āñdhiyoñ ke sabab

kahāñ ko jā.egī kis ke dayār kī miTTī

simaT hī jā.egī ik roz sun le ‘dīp-shikhā'

ye tere jism kī tere hisār kī miTTī

jigar ke chaak pe raqsan ye pyar ki miTTi

mahak rahi hai tere intizar ki miTTi

shikasta hijr ke mausam mein hum ne dekhi hai

KHizan ki shakl mein fasl-e-bahaar ki miTTi

guzarte waqt ki manind mere hathon se

phisal na jae tere eatibar ki miTTi

main us ke badle mein de dun jahan ki daulat

kahin mile jo mujhe ku-e-yar ki miTTi

lagi hai bhiD farishton ki KHair-maqdam ko

zarur hai ye kisi din-dar ki miTTi

kise KHabar hai ki hijrat ki aandhiyon ke sabab

kahan ko jaegi kis ke dayar ki miTTi

simaT hi jaegi ek roz sun le ‘dip-shikha'

ye tere jism ki tere hisar ki miTTi