jigar ke chhaalon ko dida-e-tar hara tu rakhna baras baras ke

jigar ke chhāloñ ko dīda-e-tar harā tū rakhnā baras baras ke

kahīñ na ban jaa.eñ daaġh kaale ye soz-e-ġham se jhulas jhulas ke

hamāre dil meñ bhī hasrateñ thiiñ hameñ bhī hāsil masarrateñ thiiñ

vo miT chukīñ ab jo ādateñ thiiñ ye tazkire haiñ ka.ī baras ke

na ab hai saaqī na ab hai sāġhar vo din ga.e aish thā mayassar

hameñ rulāyā hai ḳhuun shab bhar ghaTā ne shab ko baras baras ke

miTā.īñ ġham-ḳhvāriyoñ kī rāheñ dikhā.īñ kyoñ yaas kī nigāheñ

abas bharīñ maiñ ne sard aaheñ ki uḌ ga.e hosh ham-nafas ke

kabhī chaman ke the rahne vaale kabhī the āzād ranj-o-ġham se

na pūchh sayyād vo fasāne ki ab to qaidī haiñ ham qafas ke

nigāh 'shabbīr' se jo pherī to tū ne saaqī pilā.ī kyūñkar

ye be-ruḳhī aisī be-vafā.ī na phir chakhā.ī lagā ke chaske

jigar ke chhaalon ko dida-e-tar hara tu rakhna baras baras ke

kahin na ban jaen dagh kale ye soz-e-gham se jhulas jhulas ke

hamare dil mein bhi hasraten thin hamein bhi hasil masarraten thin

wo miT chukin ab jo aadaten thin ye tazkire hain kai baras ke

na ab hai saqi na ab hai saghar wo din gae aish tha mayassar

hamein rulaya hai KHun shab bhar ghaTa ne shab ko baras baras ke

miTain gham-KHwariyon ki rahen dikhain kyon yas ki nigahen

abas bharin main ne sard aahen ki uD gae hosh ham-nafas ke

kabhi chaman ke the rahne wale kabhi the aazad ranj-o-gham se

na puchh sayyaad wo fasane ki ab to qaidi hain hum qafas ke

nigah 'shabbir' se jo pheri to tu ne saqi pilai kyunkar

ye be-ruKHi aisi be-wafai na phir chakhai laga ke chaske