jigar ki aab bujhe jis se jald wo shai la

jigar kī aab bujhe jis se jald vo shai lā

lagā ke barf meñ saaqī surāhī-e-mai lā

qadam ko haath lagātā huuñ uTh kahīñ ghar chal

ḳhudā ke vāste itne to paañv mat phailā

nikal ke vāda-e-vahshat se dekh ai majnūñ

ki kaisī dhuum se aatā hai nāqa-e-lailā

girā jo haath se farhād ke kahīñ tesha

darūn-e-koh se niklī sadā-e-vāvailā

nazākat us gul-e-ra.anā kī dekhiye 'inshā'

nasīm-e-sub.h jo chhū jaa.e rang ho mailā

jigar ki aab bujhe jis se jald wo shai la

laga ke barf mein saqi surahi-e-mai la

qadam ko hath lagata hun uTh kahin ghar chal

KHuda ke waste itne to panw mat phaila

nikal ke wada-e-wahshat se dekh ai majnun

ki kaisi dhum se aata hai naqa-e-laila

gira jo hath se farhad ke kahin tesha

darun-e-koh se nikli sada-e-wawaila

nazakat us gul-e-rana ki dekhiye 'insha'

nasim-e-subh jo chhu jae rang ho maila