jigar mein dard na rakh dil mein iztirab na rakh

jigar meñ dard na rakh dil meñ iztirāb na rakh

tū apnī āñkhoñ meñ us bevafā ke ḳhvāb na rakh

junūñ-zada hī nikāleñge ab koī sūrat

ḳhirad-parastoñ se ummīd-e-inqalāb na rakh

amīr-e-shahr kī ḳhushnūdiyoñ se kyā hāsil

tū rehn us ke liye hoñToñ ke gulāb na rakh

na jaane kaun se darvāze se vo dāḳhil ho

kisī bhī daur meñ band apne dil ke baab na rakh

safar agar hai zarūrī to jā magar ai dost

kisī bhī shaḳhs ko hamrāh-o-ham-rikāb na rakh

vo apne fan kī badaulat kahāñ nahīñ maqbūl

hunar-varoñ ke sar ehsān-e-intiḳhāb na rakh

shabāb to hai ba-zāt-e-ḳhud ek hangāma

tū mujh pe tohmat-e-hangāma-e-shabāb na rakh

ḳhud apnā tajziya kar apnī ḳhāmiyoñ ko DhūñD

kisī kī zaat pe ilzām-e-ijtināb na rakh

jo honā hai yahīñ ho jaa.e ai mire maulā

mirā hisāb sar-e-roz-e-ehtisāb na rakh

jo mujh se milnā hai 'rahbar' to mil khule dil se

ki darmiyāñ koī parda koī hijāb na rakh

jigar mein dard na rakh dil mein iztirab na rakh

tu apni aankhon mein us bewafa ke KHwab na rakh

junun-zada hi nikalenge ab koi surat

KHirad-paraston se ummid-e-inqalab na rakh

amir-e-shahr ki KHushnudiyon se kya hasil

tu rehn us ke liye honTon ke gulab na rakh

na jaane kaun se darwaze se wo daKHil ho

kisi bhi daur mein band apne dil ke bab na rakh

safar agar hai zaruri to ja magar ai dost

kisi bhi shaKHs ko hamrah-o-ham-rikab na rakh

wo apne fan ki badaulat kahan nahin maqbul

hunar-waron ke sar ehsan-e-intiKHab na rakh

shabab to hai ba-zat-e-KHud ek hangama

tu mujh pe tohmat-e-hangama-e-shabab na rakh

KHud apna tajziya kar apni KHamiyon ko DhunD

kisi ki zat pe ilzam-e-ijtinab na rakh

jo hona hai yahin ho jae ai mere maula

mera hisab sar-e-roz-e-ehtisab na rakh

jo mujh se milna hai 'rahbar' to mil khule dil se

ki darmiyan koi parda koi hijab na rakh