jigar pe dagh liye dil pe zaKHm khae hue

jigar pe daaġh liye dil pe zaḳhm khaa.e hue

chaman ke phuul bhī kyā kyā haiñ rang laa.e hue

haiñ zarre zarre ko ḳhurshīd-o-mah banā.e hue

ye kis ke jalve jahāñ bhar meñ haiñ samā.e hue

dikhā de tab-e-rasā kuchh bulandī-e-afkār

mire ḳhayāl kī duniyā meñ haiñ vo aa.e hue

ruḳh-e-sabīh se kis ne naqāb uThā.ī hai

sitāre bām-e-falak ke haiñ jhilmilā.e hue

bayāñ karūñ to taḌap jaa.e barq-e-aiman bhī

mirī nigāh meñ jalve haiñ vo samā.e hue

kisī hasīn kī nīchī nazar ḳhudā kī panāh

hazāroñ fitna-e-mahshar ko hai uThā.e hue

ye nā-rasā.ī-e-qismat bhī ik tamāshā hai

bigaḌ ga.e haiñ mire khel sab banā.e hue

khulā na rāz-e-shab-e-ġham ki ho ga.e ruḳhsat

sitāre sub.h ke dāman meñ muñh chhupā.e hue

natīja-e-shab-e-va.ada samajh ke ham 'muslim'

abhī se sham-e-tamannā ko haiñ bujhā.e hue

jigar pe dagh liye dil pe zaKHm khae hue

chaman ke phul bhi kya kya hain rang lae hue

hain zarre zarre ko KHurshid-o-mah banae hue

ye kis ke jalwe jahan bhar mein hain samae hue

dikha de tab-e-rasa kuchh bulandi-e-afkar

mere KHayal ki duniya mein hain wo aae hue

ruKH-e-sabih se kis ne naqab uThai hai

sitare baam-e-falak ke hain jhilmilae hue

bayan karun to taDap jae barq-e-aiman bhi

meri nigah mein jalwe hain wo samae hue

kisi hasin ki nichi nazar KHuda ki panah

hazaron fitna-e-mahshar ko hai uThae hue

ye na-rasai-e-qismat bhi ek tamasha hai

bigaD gae hain mere khel sab banae hue

khula na raaz-e-shab-e-gham ki ho gae ruKHsat

sitare subh ke daman mein munh chhupae hue

natija-e-shab-e-wada samajh ke hum 'muslim'

abhi se sham-e-tamanna ko hain bujhae hue