ji kar kabhi mare kabhi mar kar jiya kiye

jī kar kabhī mare kabhī mar kar jiyā kiye

kyā kahiye hijr-e-yār meñ kyā kyā kiyā kiye

baiThā huuñ phir tasavvur-e-zulf-e-dutā kiye

dil ko asīr-e-halqa-e-dām-e-balā kiye

maiñ kyā huuñ merī koshish-e-nākām kyā milā

bigḌe hue tire hī karam se banā kiye

vo raah tere vahshī ne tai kar liye tamām

jin meñ janāb-e-ḳhizr bhaTakte phirā kiye

us ne mirī umiid ke dāman ko bhar diyā

maiñ ne kabhī darāz jo dast-e-du'ā kiye

allah re ḳhud-numā.ī-e-husn-e-fareb-kār

ā.īna dekh dekh vo hairāñ huā kiye

tirchhī nazar ko phir bhī rahā pās-e-ehtiyāt

tīroñ ne par nishāne na hargiz ḳhatā kiye

kashtī ko 'nūr' bahr-e-havādis meñ Daal kar

baiThā hai nā-ḳhudā bhī supurd-e-ḳhudā kiye

ji kar kabhi mare kabhi mar kar jiya kiye

kya kahiye hijr-e-yar mein kya kya kiya kiye

baiTha hun phir tasawwur-e-zulf-e-duta kiye

dil ko asir-e-halqa-e-dam-e-bala kiye

main kya hun meri koshish-e-nakaam kya mila

bigDe hue tere hi karam se bana kiye

wo rah tere wahshi ne tai kar liye tamam

jin mein janab-e-KHizr bhaTakte phira kiye

us ne meri umid ke daman ko bhar diya

main ne kabhi daraaz jo dast-e-du'a kiye

allah re KHud-numai-e-husn-e-fareb-kar

aaina dekh dekh wo hairan hua kiye

tirchhi nazar ko phir bhi raha pas-e-ehtiyat

tiron ne par nishane na hargiz KHata kiye

kashti ko 'nur' bahr-e-hawadis mein Dal kar

baiTha hai na-KHuda bhi supurd-e-KHuda kiye